ട്രെയിൻ ടിക്കറ്റ് ബുക്ക് ചെയ്താൽ ആദ്യം എല്ലാവരുടെയും ശ്രദ്ധ പോകുന്നത് ടിക്കറ്റ് കൺഫം ആയോ എന്ന കാര്യത്തിലേക്കാണ്.
എന്നാൽ ടിക്കറ്റിൽ കാണുന്ന GNWL, RLWL, PQWL, RAC, WL തുടങ്ങിയ സ്റ്റാറ്റസുകൾ പലർക്കും ഇപ്പോഴും ആശയക്കുഴപ്പമുണ്ടാക്കുന്നവയാണ്. യഥാർഥത്തിൽ, ടിക്കറ്റ് സ്ഥിരീകരിക്കപ്പെടാനുള്ള സാധ്യത, യാത്ര ചെയ്യാനാകുമോ, ബെർത്ത് ലഭിക്കുമോ തുടങ്ങിയ നിർണായക വിവരങ്ങളാണ് ഈ കോഡുകൾ സൂചിപ്പിക്കുന്നത്.
ഓരോ സ്റ്റാറ്റസിനും വ്യത്യസ്തമായ അർഥവും റെയിൽവേയുടെ പ്രത്യേക നിയമങ്ങളുമുണ്ട്. ഇവയെക്കുറിച്ച് വ്യക്തമായി അറിഞ്ഞാൽ അവസാന നിമിഷത്തിലെ ആശങ്കകളും അനിശ്ചിതത്വങ്ങളും ഒഴിവാക്കി കൂടുതൽ ആത്മവിശ്വാസത്തോടെ യാത്ര ആസൂത്രണം ചെയ്യാൻ സാധിക്കും.
GNWL (General Waiting List): സ്ഥിരീകരണ സാധ്യത ഏറ്റവും കൂടുതൽ
ട്രെയിൻ പുറപ്പെടുന്ന പ്രധാന സ്റ്റേഷനിൽ നിന്നോ അതിനോട് ചേർന്ന പ്രധാന സ്റ്റേഷനിൽ നിന്നോ ടിക്കറ്റ് ബുക്ക് ചെയ്യുന്നവർക്ക് ലഭിക്കുന്നതാണ് GNWL. ഇന്ത്യൻ റെയിൽവേയിലെ ഏറ്റവും സാധാരണമായ വെയിറ്റിങ് ലിസ്റ്റ് വിഭാഗമാണിത്. യാത്ര റദ്ദാക്കലുകൾ കൂടുതലായി നടക്കുന്നതിനാൽ GNWL ടിക്കറ്റുകൾക്ക് മറ്റ് വെയിറ്റിങ് ലിസ്റ്റുകളെ അപേക്ഷിച്ച് സ്ഥിരീകരിക്കപ്പെടാനുള്ള സാധ്യതയും കൂടുതലാണ്.
RLWL (Remote Location Waiting List): ഇടത്താവള യാത്രക്കാർക്ക്
ട്രെയിനിന്റെ ആരംഭ-അവസാന സ്റ്റേഷനുകൾക്കിടയിലെ പ്രധാന ഇടത്താവളങ്ങളിൽ നിന്ന് യാത്ര ആരംഭിക്കുന്നവർക്കാണ് RLWL ലഭിക്കുക. ഈ ക്വാട്ടയിൽ റദ്ദാക്കൽ കുറവായതിനാൽ GNWL-നെ അപേക്ഷിച്ച് സ്ഥിരീകരണ സാധ്യത കുറവായിരിക്കും. അതേ റിമോട്ട് ലൊക്കേഷൻ ക്വാട്ടയിലെ യാത്രക്കാർ ടിക്കറ്റ് റദ്ദാക്കുമ്പോഴാണ് പ്രധാനമായും RLWL മുന്നോട്ട് നീങ്ങുന്നത്.
PQWL (Pooled Quota Waiting List): ഇടത്താവളങ്ങൾക്കിടയിലെ യാത്ര
ട്രെയിനിന്റെ തുടക്കമോ അവസാനമോ അല്ലാത്ത രണ്ട് ഇടത്താവള സ്റ്റേഷനുകൾക്കിടയിൽ യാത്ര ചെയ്യുന്നവർക്ക് ലഭിക്കുന്നതാണ് PQWL. ഇത്തരം റൂട്ടുകൾക്കായി പ്രത്യേക പൂൾഡ് ക്വാട്ടയാണ് റെയിൽവേ മാറ്റിവയ്ക്കുന്നത്. അതിനാൽ ഈ ക്വാട്ടയിൽ ഉണ്ടാകുന്ന റദ്ദാക്കലുകളെ ആശ്രയിച്ചാണ് ടിക്കറ്റ് സ്ഥിരീകരിക്കുക. സാധാരണയായി PQWL-ന്റെ സ്ഥിരീകരണ സാധ്യത GNWL-നേക്കാൾ കുറവായിരിക്കും.
RLWL ആണോ PQWL ആണോ മികച്ചത്?
പൊതുവെ RLWL ടിക്കറ്റുകൾക്ക് PQWL-നേക്കാൾ സ്ഥിരീകരണ സാധ്യത കൂടുതലാണ്. എന്നാൽ രണ്ടും GNWL-നേക്കാൾ പിന്നിലാണ്. സാധാരണ സാഹചര്യത്തിൽ സ്ഥിരീകരണ സാധ്യതയുടെ ക്രമം:
GNWL > RLWL > PQWL
എന്നിരുന്നാലും യാത്രയുടെ റൂട്ട്, സീസൺ, ട്രെയിനിലെ തിരക്ക്, റദ്ദാക്കലുകളുടെ എണ്ണം തുടങ്ങിയ ഘടകങ്ങളും അന്തിമ സ്ഥിരീകരണത്തെ സ്വാധീനിക്കും.
RAC ടിക്കറ്റ് എന്താണ്?
RAC (Reservation Against Cancellation) വെയിറ്റിങ് ലിസ്റ്റിൽ നിന്ന് വ്യത്യസ്തമാണ്. ടിക്കറ്റിൽ RAC സ്റ്റാറ്റസ് ആണെങ്കിൽ യാത്ര ചെയ്യാൻ അനുവാദമുണ്ടാകും. എന്നാൽ തുടക്കത്തിൽ മുഴുവൻ ബെർത്ത് ലഭിക്കില്ല. സാധാരണയായി മറ്റൊരു RAC യാത്രക്കാരനൊപ്പം പങ്കിടുന്ന സൈഡ് ലോവർ സീറ്റ് ലഭിക്കും. ട്രെയിൻ പുറപ്പെടുന്നതിന് മുമ്പ് ടിക്കറ്റ് റദ്ദാക്കലുകൾ ഉണ്ടായാൽ RAC ടിക്കറ്റ് പിന്നീട് കൺഫം ബെർത്തായി മാറാനും സാധ്യതയുണ്ട്.
