മലപ്പുറം: ചേളാരിയിൽ ഓടിക്കൊണ്ടിരുന്ന ആംബുലൻസിന് മുന്നിലേക്ക് ചാടി ഒഡിഷ സ്വദേശിയായ യുവാവ് മരിച്ചു. പടിക്കലിന് സമീപം ഞായറാഴ്ച ഉച്ചയോടെയാണ് സംഭവം. ഒഡിഷ സ്വദേശി കേശവ് പ്രധാൻ (21) ആണ് മരിച്ചത്.
ആംബുലൻസ് അടുത്തെത്തുന്നത് കാത്തു നിന്ന ശേഷം യുവാവ് വാഹനത്തിന് മുന്നിലേക്ക് ചാടുന്നതിന്റെ സിസിടിവി ദൃശ്യങ്ങൾ പുറത്തു വന്നു. ഇടിയുടെ ആഘാതത്തിൽ ഗുരുതരമായി പരിക്കേറ്റ ഇയാളെ തിരൂരങ്ങാടി താലൂക്ക് ആശുപത്രിയിൽ എത്തിച്ചെങ്കിലും രക്ഷിക്കാനായില്ല.
ഞായറാഴ്ച രാവിലെ കാറിന് മുന്നിലേക്ക് ചാടി ഇയാൾ ജീവനൊടുക്കാൻ ശ്രമിച്ചിരുന്നതായി ദൃക്സാക്ഷികൾ പറഞ്ഞു. അന്ന് നിസാര പരിക്കുകളോടെ രക്ഷപ്പെട്ട ഇയാളെ പൊലീസ് ആശുപത്രിയിലെത്തിച്ച് ചികിത്സ നൽകിയിരുന്നു. ഇതിന് പിന്നാലെയാണ് ഉച്ചയോടെ ആംബുലൻസിന് മുന്നിലേക്ക് ചാടി മരിച്ചത്.
യുവാവ് അമിതമായി മദ്യപിക്കുന്നയാളായിരുന്നെന്ന് തിരൂരങ്ങാടി പൊലീസ് പറഞ്ഞു. മൃതദേഹം തിരൂരങ്ങാടി താലൂക്ക് ആശുപത്രി മോർച്ചറിയിലേക്ക് മാറ്റി.
