കണ്ണൂർ : നിതിന് രാജിന്റെ മരണത്തില് നിര്ണായക സിസിടിവി ദൃശ്യങ്ങള് പുറത്ത്. പ്രിന്സിപ്പലിന്റെ മുറിയില്വെച്ച് നിതിന്റെ ഫോണ് പരിശോധിക്കുന്നതാണ് ദൃശ്യങ്ങളിലുള്ളത്. നിതിന് മരിക്കുന്നതിന് 25 മിനിറ്റ് മുന്പ് ഉള്ളതാണ് ദൃശ്യം.
insta പേ ലോണ് ആപ്പില് നിന്നും നിരന്തരമായി ഭീഷണി സന്ദേശങ്ങള് വരുന്നതുമായി ബന്ധപ്പെട്ട് ലത ടീച്ചര് പ്രിന്സിപ്പലിന് പരാതി നല്കുന്നുണ്ട്. ആ സമയത്തും ടീച്ചര്ക്ക് കാള് വരുന്നു. പ്രിന്സിപ്പല് ലോണ് ആപ്പുകാരോട് സംസാരിക്കുന്നതും ദൃശ്യങ്ങളില് കാണാം.
ലോണ് ആപ്പുമായി ബന്ധപ്പെട്ട കാര്യങ്ങള് നിതിന്രാജ് പ്രിന്സിപ്പലിന് വിവരിച്ചു നല്കുന്നതും ദൃശ്യങ്ങളിലുണ്ട്. ടീച്ചറുടെ നമ്പര് റെഫെറന്സ് ലിസ്റ്റില് നിന്നും ഒഴിവാക്കുന്നതിന് ആവശ്യപെടുമ്പോഴും, ലോണ് ആപ്പുകാര് ഭീഷണി പെടുത്തുന്നു. പേയ്മെന്റ് പൂര്ത്തിയാകാതെ ആരുടേയും നമ്പര് ഒഴിവാക്കില്ലെന്ന് പറയുന്നു.
സംഭവത്തില് കുറ്റാരോപിതരായ അധ്യാപകര് ഡോ. റാമും, ഡോ. സംഗീത നമ്പ്യാരും മുന്കൂര് ജാമ്യാപേക്ഷ നല്കിയിട്ടുണ്ട്. ആത്മഹത്യയില് തങ്ങള്ക്ക് പങ്കില്ലെന്നും ലോണ് ആപ്പില് നിന്നുള്ള ഭീഷണിയാകാം നിതിന് രാജിന്റെ മരണത്തിലേക്ക് നയിച്ചതെന്നുമാണ് തലശ്ശേരി സെഷന്സ് കോടതിയില് നല്കിയ അപേക്ഷയില് അദ്ധ്യാപകരുടെ വാദം.
