തൃപ്പൂണിത്തുറ : കനത്ത മഴയിൽ പലയിടത്തും വെള്ളം കയറിയിരിക്കുകയാണ്. കൊച്ചി നഗരത്തില് വെള്ളക്കെട്ട് മൂലമുള്ള ദുരിതം തുടരുന്നതിനിടെ തൃപ്പുണിത്തുറ പേട്ടയിൽ യൂബര് ടാക്സി കാര് കാനയിൽ വീണു. യാത്രക്കാരനെ ഇറക്കിയശേഷം പേട്ടയിലൂടെ ഗൂഗിള് മാപ്പുമിട്ട് പോകുന്നതിനിടെയാണ് റോഡിനോട് ചേര്ന്നുള്ള കാനയിലേക്ക് കാര് വീണത്.
കാനയും റോഡും തിരിച്ചറിയാൻ കഴിയാത്ത വിധം സ്ഥലത്ത് വെള്ളം കയറിയിരുന്നു. ഇതിനിടെയാണ് സ്ഥലപരിചയമില്ലാത്ത യൂബര് ഓണ്ലൈൻ ടാക്സി ഡ്രൈവര് അപകടത്തിൽപ്പെട്ടത്.
ഡ്രൈവര് മാത്രമാണ് കാറിലുണ്ടായിരുന്നത്. വഴിയാണെന്ന് തെറ്റിദ്ധരിച്ച് കാര് തിരിച്ചപ്പോഴാണ് കാനയിലേക്ക് വീണത്. ഉടൻ തന്നെ ഡ്രൈവര് കാറിൽ നിന്നിറങ്ങി രക്ഷപ്പെടുകയായിരുന്നു. നാട്ടുകാർ മണിക്കൂറുകളോളം പരിശ്രമിച്ചു കാർ കരയിൽ കയറ്റി. വണ്ടിക്കുള്ളിൽ മുഴുവൻ വെള്ളവും ചെറുമീനുകളും കയറിയ നിലയിലായിരുന്നു.
