നെടുങ്കണ്ടം : കമ്പംമെട്ട് പോലീസ് നടത്തിയ വാഹന പരിശോധനയ്ക്കിടെ 105 ഗ്രാം ഹാഷിഷ് ഓയിലുമായി യുവാവ് പിടിയിൽ. ആലപ്പുഴ വണ്ടാനം സ്വദേശി അഷ്കർ(24) ആണ് പിടിയിലായത്.
ഇന്നലെ ഉച്ചകഴിഞ്ഞ് 2.30 ഓടെ കമ്പംമെട്ട് പോലീസ് അന്യാർതൊളു നിർമലാപുരം ഭാഗത്ത് വാഹന പരിശോധന നടത്തുന്നതിനിടെ കറുത്ത ബാഗുമായി ഒരു യുവാവ് സംശയാസ്പദമായ സാഹചര്യത്തിൽ റോഡിൽ നിൽക്കുന്നതായി കാണുകയും തുടർന്ന് ഇയാളുടെ ബാഗിൽ നിന്നും ഹാഷിഷ് ഓയിൽ കണ്ടെത്തുകയുമായിരുന്നു. സംഭവവുമായി ബന്ധപ്പെട്ട് പ്രതിയെ കൂടുതൽ ചോദ്യം ചെയ്യും. ഇന്ന് പ്രതിയെ കോടതിയിൽ ഹാജരാക്കും.
കമ്പംമെട്ട് എസ്.ഐ വർഗീസ് ജോസഫ്, സി.പി.ഓമാരായ തോമസ്, റിയാസ് എന്നിവർ ചേർന്നാണ് പ്രതിയെ പിടികൂടിയത്.
