ന്യൂഡൽഹി : മാസങ്ങൾ നീണ്ട നിയന്ത്രണങ്ങൾക്കും പ്രതിഷേധങ്ങൾക്കും പിന്നാലെ ദൽഹിയിലെ ജന്തർ മന്തർ റോഡിലെ അടച്ചിട്ട മേഖല വീണ്ടും തുറന്നു. ബാരിക്കേഡുകൾ നീക്കിയതോടെ പ്രദേശത്തെ ഗതാഗതവും വ്യാപാരവും സാധാരണ നിലയിലേക്ക് മടങ്ങി. നിയന്ത്രണങ്ങൾ പിൻവലിച്ചെങ്കിലും കനത്ത പൊലീസ് വിന്യാസം തുടരുകയാണ്.
*ദൽഹിയിലെ പ്രതിഷേധങ്ങളുടെ പ്രധാന കേന്ദ്രമായിരുന്നു ജന്തർ മന്തർ. പതിനേഴ് ദിവസം നീണ്ട സിജെപി സമരം ദേശീയ ശ്രദ്ധയാകർഷിച്ചതോടെ പ്രദേശത്തേക്കുള്ള വാഹനഗതാഗതത്തിന് നിയന്ത്രണം ഏർപ്പെടുത്തിയിരുന്നു.ധർമേന്ദ്ര പ്രധാന്റെ രാജിക്ക് പിന്നാലെ പ്രതിഷേധക്കാർ ഒഴിഞ്ഞെങ്കിലും ജന്തർ മന്തറിലേക്കുള്ള പ്രവേശനം പൊലീസ് തടഞ്ഞു. റോഡിന്റെ വിവിധ ഭാഗങ്ങളിൽ മൂന്നടിയോളം ഉയരമുള്ള ബാരിക്കേഡുകളും സ്ഥാപിച്ചു. സുരക്ഷാ നിയന്ത്രണങ്ങളുടെ ചുമതല ദൽഹി പൊലീസ് കേന്ദ്രസേനയ്ക്ക് കൈമാറുകയും ചെയ്തു.
ജന്തർ മന്തറിനെ ഔദ്യോഗിക പ്രതിഷേധ കേന്ദ്രങ്ങളുടെ പട്ടികയിൽ നിന്ന് ഒഴിവാക്കിയ നടപടിക്കെതിരെ വിവിധ സംഘടനകൾ പ്രതിഷേധവുമായി രംഗത്തെത്തി. ജന്തർ മന്തറിലേക്ക് പ്രവേശിക്കാൻ പലരും ശ്രമിച്ചതോടെ നിയന്ത്രണങ്ങൾ കൂടുതൽ ശക്തമാക്കി. ഒന്നര മാസത്തെ ഇടവേളയ്ക്ക് ശേഷമാണ് വീണ്ടും ബാരിക്കേഡുകൾ നീക്കി റോഡ് ഗതാഗതത്തിനായി തുറന്നുനൽകിയത്.
രാവിലെ ആറുമണിയോടെ ബാരിക്കേഡുകളെല്ലാം നീക്കിയെങ്കിലും ഉച്ചയോടെ വീണ്ടും സ്ഥാപിച്ചു. ഇതോടെ ഗതാഗതം റോഡിന്റെ ഒരു വശത്തുകൂടിയാക്കി പരിമിതപ്പെടുത്തി. പ്രദേശത്ത് കനത്ത പൊലീസ് വിന്യാസവും തുടരുകയാണ്.
