ടെഹ്റാൻ: കാസ്പിയൻ കടലിൽ ഇറാന്റെ കപ്പലിന് നേരെ യുക്രെയ്ൻ നടത്തിയ ആക്രമണത്തിന് ശക്തമായ തിരിച്ചടി ഉണ്ടാകുമെന്ന് ഇറാൻ മുന്നറിയിപ്പ് നൽകി. ആക്രമണത്തിന് ഉത്തരവാദി യുക്രെയ്ൻ പ്രസിഡന്റ് വ്ളാഡിമിർ സെലെൻസ്കിയാണെന്ന് ആരോപിച്ച വിദേശകാര്യമന്ത്രി അബ്ബാസ് അരഗ്ചി, ഈ നടപടി മറുപടിയില്ലാതെ പോകില്ലെന്നും വ്യക്തമാക്കി. ഇതോടെ പശ്ചിമേഷ്യയിലെ സംഘർഷാവസ്ഥ കൂടുതൽ സങ്കീർണമാകുമെന്ന ആശങ്ക ശക്തമായിരിക്കുകയാണ്.
ഇതിനിടെ, ഹോർമുസ് കടലിടുക്കിൽ മൈനിൽ തട്ടി ഒരു എണ്ണ ടാങ്കർ തകർന്നതായി റിപ്പോർട്ടുണ്ട്. ഇറാൻ നിർദേശിച്ച കടൽപാത വിട്ട് സഞ്ചരിച്ച കപ്പലാണ് അപകടത്തിൽപ്പെട്ടതെന്നാണ് ഇറാനിയൻ വാർത്താ ഏജൻസികൾ അറിയിച്ചത്. അതേസമയം, ചെങ്കടലിൽ രണ്ട് സൗദി എണ്ണ ടാങ്കറുകൾക്ക് നേരെയും ഹൂതി വിമതർ വീണ്ടും ആക്രമണം നടത്തിയതായി റിപ്പോർട്ടുകളുണ്ട്.
യുഎസ് പ്രഖ്യാപിച്ച വെടിനിർത്തൽ തുടർന്നാൽ തങ്ങളും സമാധാനം പാലിക്കുമെന്നാണ് ഇറാൻ്റെ നിലപാട്. 13 ദിവസം നീണ്ട വ്യോമാക്രമണങ്ങൾക്ക് താൽക്കാലിക വിരാമമിടുന്നതായി യുഎസ് പ്രസിഡന്റ് ഡൊണൾഡ് ട്രംപ് പ്രഖ്യാപിച്ചിരുന്നു. നയതന്ത്ര ചർച്ചകൾക്ക് അവസരം ഒരുക്കാനാണ് വെടിനിർത്തലെന്നാണ് അമേരിക്കയുടെ വിശദീകരണം.
എന്നാൽ, മുൻകാല അനുഭവങ്ങൾ കണക്കിലെടുത്ത് അമേരിക്കയുടെ ഉറപ്പുകളിൽ പൂർണ വിശ്വാസമില്ലെന്നാണ് ഇറാന്റെ പ്രതികരണം. യുഎസിന്റെ മിസൈൽ ശേഖരം വേഗത്തിൽ കുറഞ്ഞുവരികയാണെന്ന വിലയിരുത്തലും വെടിനിർത്തൽ പ്രഖ്യാപനത്തിന് പിന്നിലെ പ്രധാന കാരണങ്ങളിലൊന്നാകാമെന്ന സൂചനകളും പുറത്തുവരുന്നുണ്ട്.
