ചങ്ങനാശ്ശേരി : ശബരിമല വിഷയത്തിൽ എൻ എസ് എസ് സ്വീകരിച്ച സർക്കാർ അനുകൂല നിലപാട് താഴെത്തട്ടിലേക്ക് വിശദീകരിക്കാൻ ജനറൽ സെക്രട്ടറി ജി സുകുമാരൻ നായർ വിളിച്ച അടിയന്തിര യോഗം മാറ്റിവെച്ചു.
പെരുന്നയിലെ എൻഎസ്എസ് ആസ്ഥാനത്ത് നാളെ നടത്താൻ തീരുമാനിച്ച താലൂക്ക് യൂണിയൻ പ്രസിഡന്റുമാരുടെയും സെക്രട്ടറിമാരുടെയും അടിയന്തര യോഗമാണ് മാറ്റിയത്.
താലൂക്ക് യൂണിയനുകളുടെ കീഴിൽ മുൻകൂട്ടി തീരുമാനിച്ച മേഖല പ്രവർത്തക സമ്മേളനങ്ങൾ നടക്കുന്നതിനാൽ യോഗത്തിൽ പങ്കെടുക്കുന്നതിന് ഭൂരിഭാഗം താലൂക്ക് യൂണിയൻ ഭാരവാഹികളും അസൗകര്യം അറിയിച്ചതിനെ തുടർന്നാണ് പിന്നീട് ഒരു ദിവസത്തേക്ക് യോഗം മാറ്റിയത്.
ശബരിമല ആഗോള അയ്യപ്പ സംഗമത്തിൽ സർക്കാർ അനുകൂല നിലപാട് കൈക്കൊണ്ടതിന് ജനറൽ സെക്രട്ടറിക്കെതിരെ വ്യക്തിപരമായ അടക്കം വലിയ വിമർശനങ്ങൾ ഉയർന്ന പശ്ചാത്തലത്തിലാണ് കാര്യങ്ങൾ വിശദീകരിക്കാൻ യോഗം വിളിച്ചതെന്നാണ് സൂചന.
