കൊച്ചി: തന്റെ പേരിൽ വ്യാജ ഇ-മെയിൽ ഐഡി ഉണ്ടാക്കി ആളുകൾക്ക് സന്ദേശങ്ങൾ അയച്ച് തട്ടിപ്പിന് ശ്രമിക്കുന്നതായി നടൻ ടൊവിനോ തോമസ്. ഇത്തരത്തിലുള്ള സന്ദേശങ്ങളിൽ ജാഗ്രത പാലിക്കണമെന്ന് ടൊവിനോ സോഷ്യൽ മീഡിയ സ്റ്റോറിയിലൂടെ മുന്നറിയിപ്പ് നൽകി.
പ്രചരിക്കുന്ന വ്യാജ ഇ-മെയിൽ വിലാസവും താരം പുറത്തുവിട്ടിട്ടുണ്ട്. ഈ ഇ-മെയിൽ ഐഡിയുമായി തനിക്ക് യാതൊരു ബന്ധവുമില്ലെന്നും ടൊവിനോ വ്യക്തമാക്കി. തന്റെ പേരും വ്യക്തിത്വവും ദുരുപയോഗം ചെയ്ത് ആരെങ്കിലും സന്ദേശങ്ങൾ അയച്ചാൽ പ്രതികരിക്കുന്നതിന് മുമ്പ് വിവരങ്ങൾ പരിശോധിക്കണമെന്നും താരം ആവശ്യപ്പെട്ടു.
വ്യാജ ഇ-മെയിലിലൂടെ പണം ആവശ്യപ്പെടുകയോ വ്യക്തിഗത വിവരങ്ങൾ കൈമാറാൻ ആവശ്യപ്പെടുകയോ ചെയ്താൽ പ്രത്യേക ജാഗ്രത പാലിക്കണമെന്നും മുന്നറിയിപ്പുണ്ട്.
ടൊവിനോയുടെ കുറിപ്പ്…
പ്രധാനപ്പെട്ട അറിയിപ്പ് – വ്യാജ സന്ദേശങ്ങളെക്കുറിച്ച്
എന്റെ പേര് വ്യാജമായി ഉപയോഗിച്ചുകൊണ്ട് ചില വ്യക്തികൾ വിവിധ ആളുകളിലേക്ക് ഇമെയിലുകൾ അയക്കുന്നതായി എന്റെ ശ്രദ്ധയിൽപ്പെട്ടിട്ടുണ്ട്.
താഴെ പറയുന്ന വിലാസത്തിൽ നിന്നാണ് ഇമെയിലുകൾ അയക്കുന്നത്:
tovinothomas79@gmail.com
ദയവായി ശ്രദ്ധിക്കുക, ഈ ഇമെയിൽ വിലാസം എന്റേതല്ല, ഈ വിലാസം ഉപയോഗിച്ച് എന്റെ പേരിൽ ആശയവിനിമയം നടത്താൻ ഞാൻ ആർക്കും അനുവാദം നൽകിയിട്ടില്ല.
ഈ ഇ-മെയിൽ ഐഡിയിൽ നിന്ന് ലഭിക്കുന്ന സന്ദേശങ്ങൾക്ക് മറുപടി നൽകരുതെന്നും, വ്യക്തിവിവരങ്ങൾ പങ്കുവെക്കരുതെന്നും, ലിങ്കുകളിൽ ക്ലിക്ക് ചെയ്യരുതെന്നും, പണം നൽകരുതെന്നും, അത്തരം ആവശ്യങ്ങളോട് പ്രതികരിക്കരുതെന്നും എല്ലാവരോടും ഞാൻ ശക്തമായി അഭ്യർത്ഥിക്കുന്നു. ഈ വിലാസത്തിൽ നിന്ന് നിങ്ങൾക്ക് ഏതെങ്കിലും ഇമെയിൽ ലഭിക്കുകയാണെങ്കിൽ, ദയവായി അത് സ്പാം/ഫിഷിംഗ് ആയി റിപ്പോർട്ട് ചെയ്യുകയും ഉടൻ തന്നെ അത് ഡിലീറ്റ് ചെയ്യുകയും ചെയ്യുക.
ഈ വ്യാജ പ്രചരണത്തിൽ വീഴാതിരിക്കാൻ ഇത്തരം ഇമെയിലുകൾ ലഭിച്ചിട്ടുണ്ടാകാൻ സാധ്യതയുള്ള മറ്റുള്ളവരുമായും ഈ വിവരം പങ്കുവെക്കുക. ജാഗ്രത പാലിക്കുക, എന്റെ പേരിൽ വരുന്ന ഏതെങ്കിലും സന്ദേശങ്ങൾക്ക് മറുപടി നൽകുന്നതിന് മുമ്പ് അതിന്റെ ഉറവിടം പരിശോധിച്ച് ഉറപ്പുവരുത്തണം. നിങ്ങളുടെ സഹകരണത്തിനും പിന്തുണയ്ക്കും നന്ദി…
