വിര്റ്റംബര്ഗ്: യൂറോ കപ്പ് ഗ്രൂപ്പ് എയില് സ്കോട്ട്ലന്ഡിനെ ഏകപക്ഷീയമായ ഒരു ഗോളിന് തോല്പ്പിച്ച് ഹംഗറി. 100-ാം മിനിറ്റിലാണ് ഹംഗറി വിജയഗോള് നേടിയത്. ജയിച്ചാലും ഇരുടീമിനും പ്രീക്വാര്ട്ടര് സാധ്യത ഇല്ലാതിരുന്ന മത്സരത്തില് ഗ്രൂപ്പില് മൂന്നാംസ്ഥാനത്താണ് ഹംഗറി ഫിനിഷ് ചെയ്തത്. ജര്മനിയും സ്വിറ്റ്സര്ലന്ഡും ഗ്രൂപ്പില്നിന്ന് നോക്കൗട്ട് ഉറപ്പിച്ചു.
ഇന്ജുറി ടൈമില് പകരക്കാരനായെത്തിയ കെവിന് ചൊബോത്തിന്റെ കൗണ്ടര് അറ്റാക്ക് ഗോളാണ് ഹംഗറിക്ക് അവസാന നിമിഷത്തില് ജയമൊരുക്കിയത്. തോല്വിയോടെ സ്കോട്ട്ലന്ഡ് ഗ്രൂപ്പില് അവസാന സ്ഥാനക്കാരായി യൂറോകപ്പില് നിന്ന് മടങ്ങി.
മത്സരത്തിനിടെ 69-ാം മിനിറ്റില് സ്കോട്ട്ലന്ഡ് ഗോള്ക്കീപ്പര് ആന്ഗസ് ഗണ്ണുമായി കൂട്ടിയിടിച്ച് ഹംഗറി താരം ബര്ണബാസ് വര്ഗയ്ക്ക് ഗുരുതര പരിക്കേറ്റു. നിലത്തുവീണ ബര്ണബാസിന് അടിയന്തര ശുശ്രൂഷ നല്കാനായി ഡോക്ടര്മാര് ഉടന് ഗ്രൗണ്ടിലെത്തുകയും ചെയ്തു. തുടര്ന്ന് സ്ട്രെച്ചറില് ബര്ണബാസിനെ പുറത്തേക്കെത്തിച്ചു.
