കോട്ടയത്ത് എൻഡിഎ, എൽഡിഎഫ് സ്ഥാനാർത്ഥികളുടെ പത്രികാ സമർപ്പണം ഇന്ന്

കോട്ടയം : ലോക്സഭാ മണ്ഡലത്തിലെ മുന്നണി സ്ഥാനാർഥികൾ ഇന്നും നാളെയുമായി പത്രിക നൽകും.

വരണാധികാരിയായ ജില്ലാ കളക്‌ടർ വി.വിനേശ്വരിക്കാണു സ്ഥാനാർഥികൾ പത്രിക നൽകുന്നത്.

എൽഡിഎഫ് സ്ഥാനാർഥി തോമസ് ചാഴി കാടൻ, എൻഡിഎ സ്ഥാനാർഥി തുഷാർ വെള്ളാപ്പള്ളി എന്നിവർ ഇന്നു പത്രിക നൽകും. കേരള കോൺഗ്രസ് (എം) ഓഫിസിൽ നിന്നു കളക്ടറേറ്റിലേക്കു റോഡ് ഷോ നടത്തിയാണു തോമസ് ചാഴികാടൻ പത്രിക നൽകാൻ എത്തുന്നത്.

രാവിലെ 10.30നു പത്രിക നൽകും. അരീക്കര സെന്റ് റോക്കീസ് ദേവാലയ ത്തിൽ എത്തി കുർബാനയിൽ പങ്കെടുത്ത ശേഷം മാതാപിതാക്കളുടെയും സഹോദരൻ ബാബു ചാഴികാടന്റെയും കല്ലറകളിൽ പ്രാർഥന നടത്തും. തുടർന്ന് ഭരണങ്ങാനം വിശുദ്ധ അൽഫോൻസാമ്മയുടെ കല്ലറയിലും പ്രാർഥന നടത്തിയാകും എത്തുക.

എൻഡിഎ സ്ഥാനാർഥി തുഷാർ വെള്ളാപ്പള്ളി ഇന്ന് രാവിലെ 11നാകും പത്രിക നൽകുക. കളക്ടറേറ്റിനു സമീപത്തു നിന്ന് എൻഡിഎ നേതാക്കൾക്കും പ്രവർത്തകർക്കും ഒപ്പമെത്തും.

യുഡിഎഫ് സ്ഥാനാർത്ഥി കെ ഫ്രാൻസിസ് ജോർജ് നാളെ പത്രിക നൽകും.