തിരുവനന്തപുരം: സംസ്ഥാനത്തെ രാത്രികാല വൈദ്യുതി പ്രതിസന്ധിക്ക് നേരിയ ആശ്വാസമാകുന്ന തീരുമാനം. അടുത്ത വർഷം മാർച്ച് 30 വരെ ഹ്രസ്വകാല കരാറിലൂടെ വൈദ്യുതി വാങ്ങാൻ കെഎസ്ഇബിക്ക് സംസ്ഥാന വൈദ്യുതി റെഗുലേറ്ററി കമ്മിഷൻ അനുമതി നൽകി.
മൂന്ന് കമ്പനികളിൽ നിന്നായി പരമാവധി 270 മെഗാവാട്ട് വൈദ്യുതി വാങ്ങാനാണ് അനുമതി. യൂണിറ്റിന് 6.99 രൂപ മുതൽ പരമാവധി 10 രൂപ വരെ നൽകാമെന്നാണ് കമ്മിഷന്റെ നിബന്ധന. രാത്രികാലങ്ങളിൽ നേരിടുന്ന വൈദ്യുതി ക്ഷാമം പരിഹരിക്കാൻ ഈ തീരുമാനം സഹായിക്കുമെന്നാണ് പ്രതീക്ഷ. വൈദ്യുതി വാങ്ങൽ സംബന്ധിച്ച അന്തിമ വിവരങ്ങൾ ഇന്ന് വൈകീട്ട് ചേരുന്ന കെഎസ്ഇബി ഡയറക്ടർ ബോർഡ് യോഗത്തിൽ വ്യക്തമാകും.
കമ്മിഷൻ നിശ്ചയിച്ച യൂണിറ്റിന് പരമാവധി 10 രൂപ എന്ന പരിധിക്കുള്ളിലായിരിക്കും കരാർ നടപടികൾ. 2027 ഏപ്രിലിൽ യൂണിറ്റിന് 13.89 രൂപ നിരക്കിൽ വൈദ്യുതി വാങ്ങാൻ കെഎസ്ഇബി നൽകിയ അപേക്ഷ റെഗുലേറ്ററി കമ്മിഷൻ തള്ളി. ഉയർന്ന നിരക്കിലുള്ള വൈദ്യുതി വാങ്ങലിന് അനുമതി ലഭിക്കാത്ത സാഹചര്യത്തിലാണ് ഹ്രസ്വകാല കരാറിലൂടെ വൈദ്യുതി ലഭ്യമാക്കാനുള്ള പുതിയ നീക്കം.
കരാർ നടപടികൾ പൂർത്തിയാകുന്നതോടെ സംസ്ഥാനത്തെ രാത്രികാല വൈദ്യുതി ലഭ്യതയിൽ എത്രത്തോളം മാറ്റമുണ്ടാകുമെന്നത് വ്യക്തമാകും.
