വാഷിങ്ടൻ: ഗാസയിൽ ദീർഘകാല സമാധാനത്തിനും സുരക്ഷയ്ക്കും വഴിയൊരുക്കുന്ന ചരിത്രപരമായ കരാറിന് രൂപം നൽകിയതായി യു.എസ്. പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. ട്രംപിന്റെ നേതൃത്വത്തിൽ പ്രവർത്തിക്കുന്ന ‘ബോർഡ് ഓഫ് പീസ്’ നടത്തിയ നയതന്ത്ര ചർച്ചകൾക്കൊടുവിലാണ് ഹമാസും ഗാസയിലെ മറ്റ് സായുധ സംഘടനകളും പൂർണ നിരായുധീകരണത്തിന് തത്വത്തിൽ സമ്മതിച്ചതെന്നാണ് യു.എസ് അറിയിച്ചത്.
കരാർ പ്രകാരം ഹമാസ് ഘട്ടംഘട്ടമായി ആയുധങ്ങൾ കൈമാറുന്നതിനനുസരിച്ച് ഇസ്രയേൽ സൈന്യം ഗാസയിൽ നിന്ന് ഘട്ടംഘട്ടമായി പിന്മാറും. നിരായുധീകരണ നടപടികൾ പൂർത്തിയാകുന്നതുവരെ രാജ്യാന്തര സുരക്ഷാസേനയും പുതുതായി രൂപീകരിക്കുന്ന പലസ്തീൻ പൊലീസ് സേനയും ചേർന്നായിരിക്കും ഗാസയിലെ സുരക്ഷയും ക്രമസമാധാനവും ഉറപ്പാക്കുക.
ഹമാസിന്റെ ഭരണത്തിന് പകരമായി, ജനകീയ ഭരണസംവിധാനം ലക്ഷ്യമിട്ട് പുതിയ പലസ്തീൻ ഭരണകൂടം രൂപീകരിക്കുമെന്നും അത് ‘ബോർഡ് ഓഫ് പീസ്’യുമായി സഹകരിച്ച് പ്രവർത്തിക്കുമെന്നും ട്രംപ് വ്യക്തമാക്കി. സമാധാനശ്രമങ്ങളിൽ ഉണ്ടായിരിക്കുന്ന മുന്നേറ്റത്തെ അദ്ദേഹം “അത്ഭുതകരമായ പുരോഗതി” എന്നാണ് വിശേഷിപ്പിച്ചത്.
കരാറിന്റെ അടിസ്ഥാന ധാരണയിലെത്തിയതായി ഹമാസ് നേതൃത്വവും സ്ഥിരീകരിച്ചു. എന്നാൽ ഇസ്രയേൽ കരാറിലെ എല്ലാ വ്യവസ്ഥകളും പാലിക്കുന്ന സാഹചര്യത്തിലായിരിക്കും തുടർനടപടികളുമായി മുന്നോട്ടുപോകുകയെന്ന് ഹമാസ് പ്രതിനിധി ഗാസി ഹമദ് പറഞ്ഞു. ഇസ്രയേൽ സൈന്യത്തിന്റെ പൂർണ പിന്മാറ്റവും ഗാസയുടെ പുനർനിർമാണവും പുരോഗമിക്കുന്നതനുസരിച്ചായിരിക്കും നിരായുധീകരണത്തിന്റെ തുടർഘട്ടങ്ങൾ നടപ്പാക്കുക എന്നും അദ്ദേഹം വ്യക്തമാക്കി.
നിരായുധീകരണ നടപടികളിൽ ഇസ്രയേലിന് നേരിട്ട് പങ്കുണ്ടാകില്ലെന്നും, ഇതിനായി രൂപീകരിക്കുന്ന ദേശീയ സമിതിക്കായിരിക്കും പൂർണ ചുമതലയെന്നും ഹമാസ് അറിയിച്ചു. കരാർ യാഥാർഥ്യമാക്കുന്നതിൽ നിർണായക മധ്യസ്ഥത വഹിച്ച ഈജിപ്ത്, ഖത്തർ, തുർക്കി എന്നീ രാജ്യങ്ങൾക്ക് പ്രസിഡന്റ് ട്രംപ് നന്ദി രേഖപ്പെടുത്തി. 2023 ഒക്ടോബർ 7-ന് ആരംഭിച്ച ആക്രമണത്തെ തുടർന്നുണ്ടായ രൂക്ഷമായ യുദ്ധത്തിന് ശാശ്വത പരിഹാരം കാണാൻ ഈ കരാർ വഴിയൊരുക്കുമെന്നാണ് യു.എസ്. വിലയിരുത്തൽ.
