ബെംഗളുരു : ബസിടിച്ച് സ്‌കൂട്ടര്‍ യാത്രക്കാരിയായ കോളേജ് വിദ്യാര്‍ഥിനിക്ക് ദാരുണാന്ത്യം. ബംഗളൂരു മല്ലേശ്വരം സ്വദേശിയായ കുസുമിത( 21) ആണ് മരിച്ചത്. ഇന്ന് രാവിലെ 8.30ന് കുസുമിത സ്‌കൂട്ടറില്‍ കോളേജിലേക്ക് പോകുമ്പോഴായിരുന്നു അപകടം.
ബംഗളൂരു മെട്രോപൊളിറ്റന്‍ ട്രാന്‍സ്‌പോര്‍ട്ട് കോര്‍പ്പറേഷന്റെ ബസിടിച്ചായിരുന്നു അപകടം. അമിത വേഗതയിലെത്തിയ ബസ് വിദ്യാര്‍ഥിനി സഞ്ചരിച്ച സ്‌കൂട്ടറിന്റെ പിന്നിലിടിക്കുകയായിരുന്നു.
തുടര്‍ന്ന് ബസിന്റെ അടിയില്‍പ്പെട്ട വിദ്യാര്‍ഥിനിയുമായി അല്‍പ്പം മുന്നോട്ട് പോയ ശേഷമാണ് ബസ് നിര്‍ത്തിയതെന്ന് സിസി ടിവി ദൃശ്യങ്ങള്‍ വ്യക്തമാക്കുന്നു. പ്രദേശത്തുണ്ടായിരുന്നവര്‍ ഉടന്‍ തന്നെ വിദ്യാര്‍ഥിനിയെ ആശുപത്രിയില്‍ എത്തിച്ചെങ്കിലും മരണം സ്ഥിരീകരിക്കുകയായിരുന്നുവെന്ന് ട്രാഫിക്ക് പൊലീസ് പറഞ്ഞു.
സംഭവത്തില്‍ ബസ് ഡ്രൈവര്‍ക്കെതിരെ കേസെടുത്തിട്ടുണ്ടെന്നും വിശദമായ അന്വേഷണം തുടരുകയാണെന്നും നോര്‍ത്ത് ട്രാഫിക്ക് ഡിസിപി പറഞ്ഞു.
