കണ്ണൂർ : എഡിഎം കെ. നവീൻ ബാബുവിന്റെ മരണത്തിൽ ആത്മഹത്യാ പ്രേരണക്കുറ്റം ചുമത്തി പൊലീസ് കേസെടുത്തതിന് പിന്നാലെ പി.പി.ദിവ്യയെ കണ്ണൂർ ജില്ല പഞ്ചായത്ത് പ്രസിഡന്റ് പദവിയിൽ നിന്ന് സിപിഎം നീക്കി.
സിപിഎം കണ്ണൂർ ജില്ല സെക്രട്ടറിയറ്റിന്റേതാണു തീരുമാനം.
അഡ്വ. കെ.കെ.രത്ന കുമാരിയാണ് പുതിയ ജില്ല പഞ്ചായത്ത് പ്രസിഡന്റ്.
പരിയാരം ഡിവിഷനിൽ നിന്നുള്ള ജില്ല പഞ്ചായത്തംഗമാണ് രത്നകുമാരി.
സിപിഎം കണ്ണൂർ ജില്ല സെക്രട്ടറിയേറ്റിന്റെ പ്രസ്താവന
കണ്ണൂർ എഡിഎം ആയിരുന്ന കെ. നവീൻബാബുവിന്റെ അപ്രതീക്ഷിതവും വേദനാജനകവുമായ വേർപാടിനെ തുടർന്നു കണ്ണൂർ ജില്ല സെക്രട്ടറിയേറ്റ് നേരത്തേ ചില പ്രതികരണങ്ങൾ നടത്തിയിരുന്നു.
അഴിമതിക്കെതിരായ സദുദ്ദേശ വിമർശനമാണ് ജില്ല പഞ്ചായത്ത് പ്രസിഡന്റ് നടത്തിയതെങ്കിലും യാത്രയയപ്പ് യോഗത്തിൽ നടത്തിയ ചില പരാമർശങ്ങൾ ഒഴിവാക്കേണ്ടതായിരുന്നു എന്ന നിലപാടാണ് അന്ന് പാർട്ടി സ്വീകരിച്ചത്.
അതോടൊപ്പം സമഗ്രമായ അന്വേഷണം നടത്തണമെന്ന് സർക്കാരിനോട് ആവശ്യപ്പെടുകയും ചെയ്തു.
ഇപ്പോൾ പൊലീസ് കേസെടുത്ത് അന്വേഷണം നടത്തിവരുന്നതിനാൽ ജില്ല പ്രസിഡന്റ് സ്ഥാനത്ത് നിന്നും പി.പി. ദിവ്യ ഒഴിവാകണമെന്ന് ജില്ല സെക്രട്ടറിയേറ്റ് തീരുമാനിക്കുകയായിരുന്നു. അത് ദിവ്യ അംഗീകരിച്ചതിനെ തുടർന്ന് പുതിയ ജില്ല പഞ്ചായത്ത് പ്രസിഡന്റായി അഡ്വ. കെ.കെ. രത്നകുമാരിയെ പരിഗണിക്കാൻ സെക്രട്ടറിയേറ്റ് തീരുമാനിച്ചു.
പി. പി. ദിവ്യയെ സീപിഎം കൈവിട്ടു; ജില്ലാ പഞ്ചായത്ത് പ്രസിഡന്റ് സ്ഥാനം തെറിച്ചു
