കോട്ടയം: തിരുവോണ ദിനത്തിൽ കോട്ടയത്ത് കാർ പാടശേഖരത്തിലേക്ക് മറിഞ്ഞ് അപകടം. വൈകീട്ട് മൂന്നരയോടെയായിരുന്നു അപകടം സംഭവിച്ചത്.
പാമ്പാടി വട്ടമലപ്പടി സ്വദേശി രാജുവും കുടുംബാംഗങ്ങളും സഞ്ചരിച്ച കാറാണ് അപകടത്തിൽപ്പെട്ടത്. രാജുവാണ് കാർ ഓടിച്ചിരുന്നത് . ഭാര്യയും കൊച്ചുമക്കളുമാണ് കാറിലുണ്ടായിരുന്നത്.
എട്ട് മാസം പ്രായമുള്ള കൈക്കുഞ്ഞും മൂന്ന് വയസുള്ള കുട്ടിയുമുൾപ്പെടെയാണ് അപകടത്തിൽ പെട്ടത്
കോട്ടയം പനച്ചിക്കാട് അമ്പാട്ടുകടവിലാണ് കാർ പാടശേഖരത്തിലേക്ക് മറിഞ്ഞ് അപകടമുണ്ടായത്. ഭാഗ്യത്തിന് യാത്രക്കാർ പരിക്കേൽക്കാതെ രക്ഷപ്പെട്ടു.
കാർ യാത്രക്കാരെ നാട്ടുകാർ ചേർന്നാണ് രക്ഷപെടുത്തിയത്. ആമ്പൽ വസന്തം കാണുവാൻ എത്തിയ ആളുകളും നാട്ടുകാരും കടവിൽ ഉണ്ടായിരുന്നതിനാൽ അപകടത്തിൽ പെട്ടവരെ ഉടൻ രക്ഷപെടുത്തുവാൻ കഴിഞ്ഞതിനാൽ വൻ ദുരന്തം ഒഴിവായി. കാർ പിന്നീട് ക്രെയിൻ ഉപയോഗിച്ച് പൊക്കി മാറ്റി. നിയന്ത്രണം നഷ്ടമായി കാർ പാടശേഖരത്തിലേക്ക് മറിയുകയായിരുന്നു.
