ലക്‌നൗ: 2024 ലെ ലോക്സഭാ തിരഞ്ഞെടുപ്പ് കഴിഞ്ഞാൽ നരേന്ദ്രമോദി വീണ്ടും പ്രധാനമന്ത്രിയാകില്ലെന്ന് കോൺഗ്രസ് നേതാവ് രാഹുൽ ഗാന്ധി. ഉത്തർപ്രദേശിലെ കനൗജിൽ സമാജ്‌വാദി പ്രസിഡന്റ് അഖിലേഷ് യാദവിന്റെ തെരഞ്ഞെടുപ്പ് പ്രചാരണത്തിൽ പങ്കെടുത്ത് സംസാരിക്കുകയായിരുന്നു രാഹുൽ.
കഴിഞ്ഞ രണ്ടുവർഷത്തിനിടെ ഇന്ത്യ മുന്നണിയും അഖിലേഷ് യാദവും ചെയ്യേണ്ട കാര്യങ്ങളെല്ലാം ചെയ്തു. ഉത്തർപ്രദേശിലെ ജനങ്ങൾ ഒരു മാറ്റം ആ?ഗ്രഹിക്കുന്നുണ്ട്. അതിനാൽ യുപിയിൽ ബിജെപിക്ക് കനത്ത പരാജയം ഏറ്റുവാങ്ങേണ്ടിവരും. നിങ്ങൾ എഴുതിവെച്ചോളൂ, നരേന്ദ്രമോദി രാജ്യത്തിന്റെ പ്രധാനമന്ത്രിയാകില്ല, രാഹുൽ പറഞ്ഞു.
ഉത്തർപ്രദേശിൽ ഇക്കുറി ബി.ജെ.പി കനത്ത തിരിച്ചടിയാണ് നേരിടുക. ജനങ്ങൾ അത് തീരുമാനിച്ചു കഴിഞ്ഞതാണ്. അവരുടെ മനസ്സ് മാറിക്കഴിഞ്ഞു. കഴിഞ്ഞ 10 വർഷത്തിനിടെ നടത്തിയ പ്രസംഗങ്ങളിലൊന്നും നരേന്ദ്രമോദി അദാനിയെയോ അംബാനിയേയോ കുറിച്ച് ഒരക്ഷരം പോലും മിണ്ടിയിട്ടില്ല. ഇപ്പോൾ മോദിയാകെ പേടിച്ചിരിക്കുകയാണ്. ചിലർ ഭയപ്പെടുമ്പോൾ തങ്ങളെ രക്ഷിക്കുമെന്നു വിശ്വസിക്കുന്നവരുടെ പേരുകൾ വിളിച്ചുപറയാറില്ലേ..അതുപോലെ രക്ഷപ്പെടുത്തണം എന്ന് മോദി തന്റെ രണ്ട് സുഹൃത്തുക്കളുടെ പേര് വിളിച്ച് ‘അയ്യോ രക്ഷിക്കണേ’ എന്ന് നിലവിളിക്കുക യാണെന്ന് രാഹുൽ കൂട്ടിച്ചേർത്തു.
