വിജയത്തിന് പിന്നാലെ സഖ്യരാഷ്ട്രീയം തള്ളി പ്രശാന്ത് കിഷോർ

പാറ്റ്ന : ബാങ്കിപ്പൂർ നിയമസഭാ ഉപതിരഞ്ഞെടുപ്പിലെ വിജയത്തിന് പിന്നാലെ മറ്റ് രാഷ്ട്രീയ പാർട്ടികളുമായി സഖ്യത്തിനില്ലെന്ന് വ്യക്തമാക്കി ജൻ സുരാജ് പാർട്ടി സ്ഥാപകൻ പ്രശാന്ത് കിഷോർ. ബീഹാറിലെ ജനങ്ങളാണ് തങ്ങളുടെ ഏക സഖ്യകക്ഷിയെന്നും പരമ്പരാഗത രാഷ്ട്രീയ പാർട്ടികൾക്ക് ബദലായി ജനങ്ങൾ ജൻ സുരാജിനെ സ്വീകരിച്ചുവെന്നതിന്റെ തെളിവാണ് ഈ വിജയമെന്നും അദ്ദേഹം പറഞ്ഞു.

ബിജെപിയുടെ ശക്തികേന്ദ്രമായി കണക്കാക്കപ്പെട്ടിരുന്ന ബാങ്കിപ്പൂർ മണ്ഡലത്തിൽ ബിജെപി സ്ഥാനാർഥി നീരജ് കുമാറിനെ 19,000-ത്തിലധികം വോട്ടുകൾക്ക് പരാജയപ്പെടുത്തിയാണ് പ്രശാന്ത് കിഷോർ ആദ്യ തിരഞ്ഞെടുപ്പ് വിജയം സ്വന്തമാക്കിയത്. ഇതോടെ ജൻ സുരാജ് പാർട്ടി ബീഹാർ നിയമസഭയിൽ ആദ്യമായി പ്രതിനിധിത്വം നേടി. ബിജെപി, കോൺഗ്രസ്, ആർജെഡി ഉൾപ്പെടെയുള്ള പ്രധാന രാഷ്ട്രീയ പാർട്ടികളോടുള്ള അസംതൃപ്തിയും ജനങ്ങളുടെ പിന്തുണയും തനിക്ക് അനുകൂലമായതായി പ്രശാന്ത് കിഷോർ അവകാശപ്പെട്ടു. മൂന്ന് പതിറ്റാണ്ടായി ബിജെപിയുടെ കൈവശമുണ്ടായിരുന്ന മണ്ഡലത്തിലെ ഈ വിജയം സംസ്ഥാനത്തെ എൻഡിഎ സർക്കാരിനെതിരായ ജനവിധിയാണെന്നും അദ്ദേഹം പറഞ്ഞു.

ഇന്ത്യ മുന്നണിയിലോ മറ്റേതെങ്കിലും രാഷ്ട്രീയ സഖ്യത്തിലോ ചേരുമോ എന്ന ചോദ്യത്തിന്, ഒറ്റയ്ക്ക് മുന്നോട്ട് പോകാനാണ് തീരുമാനമെന്നും ജനങ്ങളുടെ പിന്തുണയോടെ ബീഹാറിൽ യഥാർഥ രാഷ്ട്രീയ മാറ്റം കൊണ്ടുവരികയാണ് ലക്ഷ്യമെന്നും അദ്ദേഹം വ്യക്തമാക്കി.