ഇടുക്കിയിൽ അഞ്ചുനില കെട്ടിടം ഇടിഞ്ഞുവീണു; നിർമാണത്തിലെ അപാകതയെന്ന് നിഗമനം

കുമളി : ഇടുക്കിയിൽ നിർമാണത്തിലിരുന്ന അഞ്ചുനില കെട്ടിടം ഇടിഞ്ഞുവീണു. പാമ്പനാറിൽ ദേശീയപാതയ്ക്ക് സമീപത്തുള്ള കെട്ടിടമാണ് ഇന്നു പുലർച്ചെ തകർന്നുവീണത്. പാമ്പനാർ സ്വദേശി ആഗ്നൽ എന്നയാളുടെ ഉടമസ്ഥതയിലുള്ള കെട്ടിടമാണ് ഇടിഞ്ഞുവീണത്.

അപകടം നടക്കുന്ന സമയത്ത് കെട്ടിടത്തിൽ തൊഴിലാളികൾ ആരും ഉണ്ടായിരുന്നില്ലെന്നാണ് വിവരം. ഇത് വലിയ അപകടം ഒഴിവാക്കി. നിർമാണത്തിലെ അപാകതയാണ് അപകടത്തിന് കാരണമെന്നാണ് നിഗമനം. ദേശീയപാതയ്ക്ക് സമീപത്തുള്ള കെട്ടിടം ഒരു വർഷമായി നിർമാണത്തിലിരിക്കുകയായിരുന്നു.