കോഴിക്കോട് : നിരവധി വാഹന മോഷണക്കേസുകളിലെ പ്രതി പരപ്പനങ്ങാടി ചെട്ടിപ്പടി സ്വദേശി മുഹമ്മദ് ഹക്കിം(26) പിടിയിലായി. കൊയിലാണ്ടി റെയില്‍വേ സ്റ്റേഷന് സമീപത്ത് നിന്ന് മോഷ്ടിച്ച ബൈക്കുമായി കഴിഞ്ഞ ദിവസം അര്‍ധരാത്രി വരുന്നതിനിടെ കോഴിക്കോട് ദേശീയപാതയില്‍ പാലോറമലയില്‍ വെച്ച് പെട്രോള്‍ തീര്‍ന്നു. തുടർന്ന് നടന്ന സംഭവങ്ങളാണ് ഇയാളെ പിടികൂടാൻ സഹായിച്ചത്.
പെട്രോള്‍ തീര്‍ന്ന ബൈക്ക് റോഡരികിലേക്ക് മാറ്റി ടാങ്ക് കുത്തിപ്പൊളിക്കാന്‍ ശ്രമിച്ചതിനെ തുടര്‍ന്ന് നാട്ടുകാര്‍ ചോദ്യം ചെയ്തു. കൃത്യമായ മറുപടി നല്‍കാതെ തട്ടിക്കയറിയ മുഹമ്മദ് ഹക്കിമിന്റെ പെരുമാറ്റത്തില്‍ സംശയം തോന്നിയതിനാല്‍ നാട്ടുകാര്‍ തടഞ്ഞുവെച്ച് എലത്തൂര്‍ പൊലീസില്‍ വിവരം അറിയിച്ചു. പൊലീസെത്തി കസ്റ്റഡിയിൽ എടുത്തപ്പോൾ ആണ് നിരവധി മോഷണക്കേസുകളില്‍ പ്രതിയാണെന്ന് തിരിച്ചറിഞ്ഞത്. തുടർന്ന് ഹക്കീമിനെ എലത്തൂര്‍ പൊലീസ് കൊയിലാണ്ടി പൊലീസിന് കൈമാറി.
മോഷ്ടിച്ച ബൈക്കുമായി വരുന്നതിനിടെ പെട്രോള്‍ തീര്‍ന്നു…വാഹന മോഷണ കേസുകളിലെ പ്രതി പിടിയിലായി
