തൃശ്ശൂർ: ഈസ്റ്റർ ദിനത്തിൽ യേശു ദേവന് ഗാനവുമായി നടനും എൻഡിഎ സ്ഥാനാർത്ഥിയുമായ സുരേഷ് ഗോപി. ഭാര്യ രാധികയ്ക്കൊപ്പം ചേർന്ന് ആലപിച്ച ഗാനമാണ് പുറത്തുവിട്ടിരിക്കുന്നത്. സംഗീത ലോകത്തിന് വേണ്ടി തനിക്ക് പറ്റുന്നതാണ് ചെയ്തത് എന്ന് ഗാനം പുറത്തുവന്നതിന് പിന്നാലെ സുരേഷ് ഗോപി പ്രതികരിച്ചു.
യേശുവിന്റെ പീഡാനുഭവങ്ങളും ഉയർത്തെഴുന്നേൽപ്പിന്റെ സന്ദേശവുമാണ് ഗാനത്തിന്റെ പ്രമേയം. പണ്ടാരപ്പറമ്പിൽ എഴുതിയ വരികളാണ് സുരേഷ് ഗോപിയും ഭാര്യ രാധികയും ചേർന്ന് ആലപിച്ചിരിക്കുന്നത്. 5 മിനിറ്റ് ദൈർഘ്യമുള്ള ഗാനത്തിന് ജേക്സ് ബിജോയ് ആണ് ഈണം നൽകിയിരിക്കുന്നത്. നന്ദിയാൽ പാടുന്നുവെന്നാണ് ഗാനത്തിന്റെ പേര്.
ഗാനത്തിന് സോഷ്യൽ മീഡിയയിൽ വൻ ജനപ്രീതിയാണ് ലഭിക്കുന്നത്. ഗാനം പുറത്തിറങ്ങി നിമിഷങ്ങൾക്കുള്ളിൽ തന്നെ വൈറൽ ആയിരുന്നു. അരുവിത്തുറ സെ.ജോർജ് പള്ളി, കുറവിലങ്ങാട് മാർത്ത മറിയം ഫൊറോന പള്ളി എന്നിവിടങ്ങളിൽ ക്വയറിൻറെ ഭാഗമായി ഗാനം ആലപിക്കുകയും ചെയ്തിരുന്നു.
