തിരുവനന്തപുരം : സിദ്ധാർഥൻ്റെ വീട് വെറ്ററിനറി സർവകലാശാലയുടെ പുതിയ വൈസ് ചാൻസലർ പി.സി.ശശീന്ദ്രൻ സന്ദർശിച്ചു. സിദ്ധാർഥിന്റെ മാതാപിതാക്കളോട് വിശദമായി സംസാരിച്ച ശേഷമാണ് അദ്ദേഹം മടങ്ങിയത്.
കേസുമായി ബന്ധപ്പെട്ട എല്ലാ കാര്യങ്ങളും പരിശോധിക്കുമെന്നു വിസി പറഞ്ഞു. ആരുടെയൊക്കെ ഭാഗത്ത് തെറ്റു പറ്റിയിട്ടുണ്ടെന്ന് കണ്ടെത്തും. സർവകലാശാലയുടെ ഭാഗത്തെ വീഴ്ച്ച ഡീൻ വിശദീകരിക്കുമെന്നും വിസി വ്യക്തമാക്കി.
സിദ്ധാർഥന്റെ മരണത്തിൽ നടപടി സ്വീകരിക്കുന്നതിൽ അനാസ്ഥ കാട്ടിയതിന് വെറ്ററിനറി സർവകലാശാലാ വൈസ് ചാൻസലർ ഡോ. എം.ആർ. ശശീന്ദ്രനാഥിനെ സർവകലാശാലാ ചാൻസലർ കൂടിയായ ഗവർണർ സസ്പെൻഡ് ചെയ്തിരുന്നു. ഇതിനു പിന്നാലെയാണ് വിസിയുടെ ചുമതല വെറ്ററിനറി കോളേജ് മുൻ ഡീൻ ഡോ. പി.സി ശശീന്ദ്രന് നൽകിയത്.
ഡോ. എം.ആർ.ശശീന്ദ്രനാഥിനെ വിസിയായി നിയമിക്കുന്ന സമയത്തു സേർച് കമ്മിറ്റി നൽകിയ മൂന്നംഗ പാനലിൽ ശശീന്ദ്രനും ഉണ്ടായിരുന്നു.
