തൃശൂർ: മനക്കൊടി ചേറ്റുപുഴ പാടത്ത് തീപിടുത്തം. സംഭവത്തിൽ ജൽജീവൻ മിഷൻ കുടിവെള്ള പദ്ധതിയുടെ പൈപ്പ് സാമഗ്രികൾ ഉൾപ്പെടെ ലക്ഷക്കണക്കിന് വില വരുന്ന സാമഗ്രികൾ കത്തി നശിച്ചു.
ഇന്ന് വൈകിട്ട് 5.30ഓടെയാണ് തീപ്പിടിത്തമുണ്ടായത്. പാടത്ത് നിന്നും പുക ഉയരുന്നത് ശ്രദ്ധയിൽപ്പെട്ട നാട്ടുകാരാണ് അഗ്നിശമന സേനയെ വിവരം അറിയിച്ചത്. തുടർന്ന് നാട്ടുകാരും ഫയർ ഫോഴ്സും പോലീസും ചേർന്ന് തീ നിയന്ത്രണ വിധേയമാക്കുകയായിരുന്നു.
തീപിടുത്തത്തിന്റെ കാരണം വ്യക്തമല്ല. ജൽജീവൻ മിഷൻ കുടിവെള്ള പദ്ധതിക്ക് വേണ്ടി സമീപ പ്രദേശങ്ങളിലേക്ക് കൊണ്ട് പോകേണ്ട പൈപ്പുകളും മറ്റു സാമഗ്രികളുമാണ് കത്തി നശിച്ചത്. 20 ലക്ഷം രൂപയുടെ നഷ്ടം സംഭവിച്ചതായാണ് പ്രാഥമികവിലയിരുത്തൽ.
