തിരുവനന്തപുരം : ഗുജറാത്തിലെ അഹമ്മദാബാദും കേരളത്തിൻ്റെ തലസ്ഥാനമായ തിരുവനന്തപുരവും ഇനി ഇരട്ട നഗരങ്ങൾ (ട്വിൻ സിറ്റീസ്).
നഗരവികസനം, അടിസ്ഥാന സൗകര്യ വികസനം, മാലിന്യസംസ്കരണം, ജലസംരക്ഷണം, നഗരഭരണം തുടങ്ങിയ മേഖലകളിൽ പരസ്പര സഹകരണം ഉറപ്പാക്കുന്നതിനാണ് ഇരു നഗരസഭകളും തമ്മിൽ ധാരണാപത്രം ഒപ്പുവച്ചത്.
തിരുവനന്തപുരം മേയർ വി വി രാജേഷിന്റെ നേതൃത്വത്തിലുള്ള എട്ടംഗ സംഘം അഹമ്മദാബാദ് മുനിസിപ്പൽ കോർപ്പറേഷൻ ആസ്ഥാനത്തെത്തി നടത്തിയ ചർച്ചകൾക്കൊടുവിലാണ് ധാരണയിലെത്തിയത്. അഹമ്മദാബാദ് മേയർ ഹിതേഷ് ബറോട്ട്, മുനിസിപ്പൽ കമ്മീഷണർ ബൻഛാ നിധി പാണി എന്നിവരുമായി സംഘം വിശദമായ ചർച്ച നടത്തി.
അഹമ്മദാബാദിൽ നടപ്പാക്കിയിട്ടുള്ള ആധുനിക മാലിന്യസംസ്കരണ സംവിധാനങ്ങൾ, മലിനജല ശുദ്ധീകരണ പ്ലാന്റുകൾ, കുടിവെള്ള വിതരണ സംവിധാനങ്ങൾ, റോഡ് വികസന പദ്ധതികൾ, മുനിസിപ്പൽ ബോണ്ടുകൾ വഴിയുള്ള ധനസമാഹരണം തുടങ്ങിയവ സംബന്ധിച്ച് ഉദ്യോഗസ്ഥർ വിശദീകരിച്ചു. സബർമതി റിവർഫ്രണ്ട്, അടൽ ബ്രിഡ്ജ്, മാലിന്യ വേർതിരിക്കൽ കേന്ദ്രങ്ങൾ എന്നിവയും തിരുവനന്തപുരം സംഘം സന്ദർശിച്ചു.
അഹമ്മദാബാദിലെ വിജയകരമായ നഗരവികസന മാതൃകകൾ തിരുവനന്തപുരത്തിന്റെ സാഹചര്യങ്ങൾക്ക് അനുയോജ്യമായി പ്രയോജനപ്പെടുത്തു ന്നതിനും സാങ്കേതികവിദ്യയുടെ സഹായത്തോടെ നഗരസഭാ സേവനങ്ങൾ മെച്ചപ്പെടുത്തുന്നതിനുമാണ് സഹകരണം ലക്ഷ്യമിടുന്നത്. ഗതാഗത ആസൂത്രണം, ജലസംരക്ഷണം, സാമ്പത്തിക മാനേജ്മെന്റ്, പൊതുസേവനങ്ങളുടെ കാര്യക്ഷമത വർധിപ്പിക്കൽ തുടങ്ങിയ മേഖലകളിലും ഇരു നഗരങ്ങളും അനുഭവങ്ങളും സാങ്കേതിക അറിവുകളും പങ്കുവയ്ക്കും.
ധാരണയുടെ ഭാഗമായി തുടർചർച്ചകളും ഉദ്യോഗസ്ഥതല സഹകരണവും പരിശീലന പരിപാടികളും സംഘടിപ്പിക്കുന്നതിനുള്ള സാധ്യതകളും പരിഗണിക്കുന്നുണ്ട്. എന്നാൽ ധാരണാപത്രത്തിന്റെ അടിസ്ഥാനത്തിൽ നടപ്പാക്കുന്ന പ്രത്യേക പദ്ധതികളോ അവയ്ക്കുള്ള തുകയോ സമയക്രമമോ ഇതുവരെ ഔദ്യോഗികമായി പ്രഖ്യാപിച്ചിട്ടില്ല.
