November 7, 2026 Webdesk
ന്യൂഡൽഹി : അടിയന്തരാവസ്ഥ പ്രഖ്യാപിച്ചത് തെറ്റായ തീരുമാനമായിരുന്നുവെന്ന് കോൺഗ്രസ് മുൻ അധ്യക്ഷ സോണിയ ഗാന്ധി. അന്നത്തെ പ്രധാനമന്ത്രി ഇന്ദിരാ ഗാന്ധിക്കും പിന്നീട് ആ തീരുമാനത്തിലെ പിഴവ് ബോധ്യപ്പെട്ടിരുന്നുവെന്നാണ് തന്റെ വിശ്വാസമെന്നും സോണിയ വ്യക്തമാക്കി.
ആത്മകഥയായ ‘Belonging: A Journey of Love’ പുറത്തിറങ്ങുന്നതിനു മുന്നോടിയായി ബ്രിട്ടീഷ് മാധ്യമമായ ‘ദി ഗാർഡിയന്’ നൽകിയ അഭിമുഖത്തിലാണ് സോണിയയുടെ വെളിപ്പെടുത്തൽ.
അടിയന്തരാവസ്ഥക്കാലത്ത് നടന്ന അതിക്രമങ്ങളിൽ ഇന്ദിരാ ഗാന്ധി പിന്നീട് പരസ്യമായി ഖേദം പ്രകടിപ്പിക്കുകയും മാപ്പുപറയുകയും ചെയ്തിരുന്നു. മകൻ സഞ്ജയ് ഗാന്ധിയുടെ ഇടപെടലുകൾ നിയന്ത്രിക്കാൻ ഇന്ദിരയ്ക്ക് കഴിഞ്ഞിരുന്നെങ്കിൽ അടിയന്തരാവസ്ഥയ്ക്കു പിന്നാലെയുണ്ടായ പല പ്രത്യാഘാതങ്ങളും ഒഴിവാക്കാമായിരുന്നുവെന്നും സോണിയ പുസ്തകത്തിൽ ചൂണ്ടിക്കാട്ടുന്നു.
അടിയന്തരാവസ്ഥ പ്രഖ്യാപിക്കുന്നതിനെ രാജീവ് ഗാന്ധി എതിർത്തിരുന്നുവെന്നാണ് സോണിയയുടെ വെളിപ്പെടുത്തൽ. അടുത്ത തിരഞ്ഞെടുപ്പ് വരെ കാത്തിരിക്കണമെന്നായിരുന്നു രാജീവിന്റെ നിർദേശം. എന്നാൽ, പ്രതിപക്ഷം ഇന്ദിരാ ഗാന്ധിയെ രാഷ്ട്രീയമായി തകർക്കാൻ ശ്രമിക്കുകയാണെന്നും അതിനെ ചെറുക്കാൻ അടിയന്തര നടപടി വേണമെന്നുമായിരുന്നു സഞ്ജയ് ഗാന്ധിയുടെ നിലപാട്.
കുടുംബാംഗങ്ങൾ ഒന്നിച്ചിരുന്ന് ഭക്ഷണം കഴിക്കുന്നതിനിടെ സഞ്ജയ് ഈ വിഷയം ഉന്നയിച്ചതായും സോണിയ അഭിമുഖത്തിൽ ഓർത്തെടുത്തു.
‘ഇന്ദിരാ ഗാന്ധി ഉള്ളിൽ ഒരു ജനാധിപത്യവാദിയായിരുന്നുവെന്നാണ് ഞാൻ എപ്പോഴും കരുതിയിരുന്നത്. പലരും ഈ അഭിപ്രായം കേട്ട് ചിരിച്ചേക്കാം. എന്നാൽ അടിയന്തരാവസ്ഥക്കാലത്ത് അവർക്ക് ഒരിക്കലും മനഃസമാധാനമുണ്ടാ യിരുന്നില്ലെന്നാണ് എന്റെ വിശ്വാസം.
ആ തീരുമാനം അവരുടെ മനസിൽ വലിയ ഭാരമായി നിലനിന്നിരുന്നു’ എന്നായിരുന്നു സോണിയയുടെ പ്രതികരണം.നെഹ്റു-ഗാന്ധി രാഷ്ട്രീയ കുടുംബത്തിലേക്കുള്ള തന്റെ കടന്നുവരവ്, വ്യക്തിജീവിതത്തിലെ സന്തോഷങ്ങൾ, നേരിട്ട വലിയ നഷ്ടങ്ങൾ, രാഷ്ട്രീയ ജീവിതത്തിലെ വെല്ലുവിളികൾ എന്നിവയെല്ലാം ആത്മകഥയിൽ സോണിയ തുറന്നു പറയുന്നുണ്ട്.
പ്രമുഖ പ്രസാധകരായ ആൽഫ്രഡ് എ. നോഫ് പുറത്തിറക്കുന്ന പുസ്തകം നവംബർ 10നാണ് പ്രസിദ്ധീകരിക്കുന്നത്.
