November 6, 2026 Webdesk 1
ന്യൂഡൽഹി : യു.എസ്. ഇടക്കാല തിരഞ്ഞെടുപ്പിൽ പ്രസിഡന്റ് ഡൊണാൾഡ് ട്രംപിന്റെ പാർട്ടിക്കേറ്റ തിരിച്ചടി ആഗോള വിപണികൾക്ക് അനുകൂലമായി. ഇറാനുമായുള്ള യുദ്ധം തിരഞ്ഞെടുപ്പിലെ തിരിച്ചടിക്ക് പ്രധാന കാരണമായെന്ന് വൈസ് പ്രസിഡന്റ് ജെ.ഡി. വാൻസ് സമ്മതിച്ചതോടെ ഇറാനെതിരായ കൂടുതൽ സൈനികനടപടികൾക്ക് അമേരിക്ക മുതിരില്ലെന്ന പ്രതീക്ഷയാണ് വിപണികളിൽ ശക്തമായത്.
ഇതിന്റെ പ്രതിഫലനമായി അസംസ്കൃത എണ്ണവിലയിലും ഡോളറിന്റെ മൂല്യത്തിലും ഇടിവുണ്ടായി. ഇന്ത്യൻ ഓഹരിവിപണിയിലും സ്വർണവിപണിയിലും ഇതോടെ മുന്നേറ്റം പ്രകടമായി.
വ്യാഴാഴ്ച വ്യാപാരത്തിന്റെ തുടക്കം മുതൽ കുതിപ്പ് തുടർന്ന ഇന്ത്യൻ ഓഹരിവിപണിയിൽ സെൻസെക്സ് 79,000 പോയിന്റും നിഫ്റ്റി 24,500 പോയിന്റും മറികടന്നു. ബി.എസ്.ഇയിൽ ലിസ്റ്റ് ചെയ്തിട്ടുള്ള കമ്പനികളുടെ ആകെ വിപണിമൂല്യം ചരിത്രത്തിലാദ്യമായി 500 ലക്ഷം കോടി രൂപ പിന്നിട്ടു. വ്യാപാരാന്ത്യത്തിൽ സെൻസെക്സ് 2,008.61 പോയിന്റ് ഉയർന്ന് 79,310ൽ എത്തി. നിഫ്റ്റി 576 പോയിന്റ് നേട്ടത്തോടെ 24,536.6ലും ക്ലോസ് ചെയ്തു.
അതേസമയം, ഇന്ത്യൻ വിപണിയിലെ മുന്നേറ്റത്തിന് വിരുദ്ധമായി അമേരിക്കൻ ഓഹരിവിപണിയിൽ നഷ്ടമാണ് രേഖപ്പെടുത്തിയത്. നാസ്ഡാക് സൂചിക 2.79 ശതമാനവും ഡൗ ജോൺസ് 0.75 ശതമാനവും ഇടിഞ്ഞു.
