റിയാദ് : സൗദി അറേബ്യയുടെ തലസ്ഥാനമായ റിയാദിലെ അന്താരാഷ്ട്ര വിമാനത്താവളത്തിന് നേരെ വീണ്ടും വ്യോമാക്രമണം.
ആക്രമണത്തെ തുടർന്ന് വിമാനത്താവളത്തിലെ വ്യോമഗതാഗതം പൂർണ്ണമായും നിർത്തിവെയ്ക്കുകയും സുരക്ഷ മുൻനിർത്തി യാത്രക്കാരെയും ജീവനക്കാരെയും സുരക്ഷിത കേന്ദ്രങ്ങളിലേക്ക് ഒഴിപ്പിക്കുകയും ചെയ്തു. നഗരത്തിന് മുകളിൽ ശക്തമായ സ്ഫോടന ശബ്ദങ്ങൾ കേട്ടതായും പ്രതിരോധ സേന ആകാശത്തുവെച്ച് ഭീഷണികൾ തകർക്കാൻ ശ്രമിച്ചതായും ദൃക്സാക്ഷികൾ വ്യക്തമാക്കി.
യമനിൽ നിന്നുള്ള ഹൂതി വിമതരുടെ ഭാഗത്തുനിന്നാണ് ഈ ആക്രമണമുണ്ടാ യതെന്നാണ് പ്രഥമ വിവരങ്ങൾ സൂചിപ്പിക്കുന്നത്. മിസൈൽ അല്ലെങ്കിൽ ഡ്രോൺ ഉപയോഗിച്ചുള്ള ആക്രമണ സാധ്യത മുൻകൂട്ടി കണ്ട് സൗദി വ്യോമ പ്രതിരോധ സംവിധാനം ജാഗ്രത പാലിച്ചിരുന്നു. എങ്കിലും സുരക്ഷാ പ്രശ്നങ്ങൾ കണക്കിലെടുത്ത് വിമാനങ്ങളുടെ ലാൻഡിംഗും ടേക്ക് ഓഫ് ചെയ്യലും അടിയന്തരമായി നിർത്തിവെക്കാൻ അധികൃതർ ഉത്തരവിടുകയായിരുന്നു.
സംഭവത്തെ തുടർന്ന് അന്താരാഷ്ട്ര സർവീസുകൾ ഉൾപ്പെടെ നിരവധി വിമാനങ്ങൾ വഴിതിരിച്ചുവിട്ടു. ആക്രമണത്തിൽ ആളപായം ഉണ്ടായോ എന്നതിനെക്കുറിച്ചുള്ള ഔദ്യോഗിക വിവരങ്ങൾ ഇതുവരെ പുറത്തുവന്നിട്ടില്ല. സുരക്ഷാ ഉദ്യോഗസ്ഥരും ബോംബ് സ്ക്വാഡും വിമാനത്താവള പരിസരത്ത് പരിശോധനകൾ നടത്തിവരികയാണ്. മേഖലയിൽ അതീവ ജാഗ്രതാ നിർദ്ദേശം പുറപ്പെടുവിച്ചിട്ടുണ്ടെന്നും വ്യോമാക്രമണങ്ങളെയും ഭീകരവാദ നീക്കങ്ങളെയും രാജ്യത്തിന്റെ സുരക്ഷാ സേന കർശനമായി നേരിടുമെന്നും സൗദി പ്രതിരോധ മന്ത്രാലയം അറിയിച്ചു.
