തിരുവനന്തപുരം : സംസ്ഥാനത്ത് മഴ മുന്നറിയിപ്പിൽ മാറ്റം. രണ്ട് ജില്ലകളിൽ പ്രഖ്യാപിച്ചിരുന്ന യെല്ലോ അലേര്ട്ട് പിന്വലിച്ചു. ആലപ്പുഴ, എറണാകുളം ജില്ലകളില് പ്രഖ്യാപിച്ചിരുന്ന മുന്നറിയിപ്പിലാണ് മാറ്റം വന്നിരിക്കുന്നത്. ഇതോടെ ഒരു ജില്ലയിലും നിലവിൽ മഴ മുന്നറിയിപ്പില്ല.
അതേസമയം നാളെയും മറ്റന്നാളുമായി ഒറ്റപ്പെട്ടയിടങ്ങളില് ശക്തമായ മഴ ലഭിച്ചേക്കും. രണ്ട് ദിവസങ്ങളില് നാല് ജില്ലകളിലായി യെല്ലോ അലേര്ട്ടാണ് പ്രഖ്യാപിച്ചിരിക്കുന്നത്. നാളെ പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലും മറ്റന്നാള് പത്തനംതിട്ട, ഇടുക്കി, എറണാകുളം, പാലക്കാട് ജില്ലകളിലുമാണ് യെല്ലോ അലേര്ട്ട് പ്രഖ്യാപിച്ചിരിക്കുന്നത്.
ബംഗാള് ഉള്ക്കടലില് ന്യൂനമര്ദ്ദം രൂപപ്പെടാനുള്ള സാധ്യത കണക്കിലെടുത്താണ് മഴ മുന്നറിയിപ്പ് പ്രഖ്യാപിച്ചിരിക്കുന്നത്. വടക്കന് ബംഗാള് ഉള്ക്കടലിനും അതിനോട് ചേര്ന്ന ബംഗ്ലാദേശ് തീരപ്രദേശത്തിനും മുകളിലായി ചക്രവാതചുഴി സ്ഥിതി ചെയ്യുന്നുണ്ടെന്നും ഇതിന്റെ സ്വാധീനഫലമായി ഇന്ന് വടക്കന് ബംഗാള് ഉള്ക്കടലിലും സമീപ പ്രദേശങ്ങള്ക്കും മുകളിലായി ന്യൂനമര്ദ്ദം രൂപപ്പെടാന് സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകിയിരുന്നു.
സംസ്ഥാനത്ത് മഴ മുന്നറിയിപ്പിൽ മാറ്റം; രണ്ട് ജില്ലകളിലെ യെല്ലോ അലേര്ട്ട് പിന്വലിച്ചു
