ടെഹ്റാൻ: ഇറാനെതിരായ യു.എസ് സൈനിക ആക്രമണം ആറാം ദിവസവും തുടർന്നു. ബന്ദർ അബ്ബാസ് ഉൾപ്പെടെയുള്ള വിവിധ നഗരങ്ങളിൽ വ്യോമാക്രമണം നടന്നതായി ഇറാൻ മാധ്യമങ്ങൾ റിപ്പോർട്ട് ചെയ്തു. രാജ്യത്തിന്റെ തെക്കൻ മേഖലയിലെ നിർണായക അടിസ്ഥാനസൗകര്യങ്ങളാണ് ഇത്തവണ പ്രധാനമായും ലക്ഷ്യമിട്ടത്. ബന്ദർ അബ്ബാസിലെ റെയിൽവേ സ്റ്റേഷനും തെക്കൻ ഇറാനിലെ രണ്ട് പാലങ്ങളും ആക്രമണത്തിൽ കേടുപാടുകൾ സംഭവിച്ചതായാണ് വിവരം. സംഭവത്തിൽ രണ്ടുപേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തതായി പ്രാഥമിക റിപ്പോർട്ടുകൾ വ്യക്തമാക്കുന്നു.
ഹോർമുസ് കടലിടുക്കിന്റെ നിയന്ത്രണം ഇറാന്റെ കൈവശമല്ലെന്ന പ്രസ്താവനയുമായി യു.എസ് പ്രതിരോധ സെക്രട്ടറി രംഗത്തെത്തി. മേഖലയിലെ സംഘർഷം രൂക്ഷമാകുന്നതിനിടെയാണ് ഈ പ്രതികരണം.
ഇതിനുമുമ്പ് അഹ്വാസ് നഗരത്തിലെ ഷാഹിദ് ബഗേയി ആശുപത്രിക്ക് നേരെയും യു.എസ് വ്യോമാക്രമണം നടത്തിയിരുന്നു. കുട്ടികളുടെ കാൻസർ ചികിത്സാ വിഭാഗം പ്രവർത്തിച്ചിരുന്ന കെട്ടിടം ആക്രമണത്തിൽ തകർന്നതോടെ രോഗികളെയും ജീവനക്കാരെയും അടിയന്തരമായി സുരക്ഷിത കേന്ദ്രങ്ങളിലേക്ക് മാറ്റേണ്ടിവന്നു.
അതേസമയം, ഹോർമുസ് കടലിടുക്കിൽ ഏർപ്പെടുത്തിയ നാവിക ഉപരോധം മറികടക്കാൻ ശ്രമിച്ചെന്നാരോപിച്ച് ‘ബെൽമ’ എന്ന എണ്ണക്കപ്പലിനും യു.എസ് ആക്രമണം നടത്തിയതായി റിപ്പോർട്ടുണ്ട്. കുറോസോയുടെ പതാകയുള്ള കപ്പൽ ഇറാന്റെ പ്രധാന എണ്ണക്കയറ്റുമതി കേന്ദ്രമായ ഖാർഗ് ദ്വീപിലേക്കുള്ള യാത്രയിലായിരുന്നു.
ഇറാനിയൻ തുറമുഖങ്ങളിലേക്കുള്ള കപ്പൽഗതാഗതം തടയുകയെന്ന ലക്ഷ്യത്തോടെയാണ് യു.എസ് ഉപരോധം ശക്തമാക്കിയിരിക്കുന്നത്. ഇതിനുള്ള തിരിച്ചടിയായി ബഹ്റൈൻ, ജോർദാൻ, കുവൈത്ത് എന്നിവിടങ്ങളിലെ യു.എസ് സൈനിക താവളങ്ങൾ ലക്ഷ്യമിട്ട് ഇറാൻ ആക്രമണം നടത്തിയതായും റിപ്പോർട്ടുകൾ സൂചിപ്പിക്കുന്നു.
