തിരുവനന്തപുരം: ബിജെപി മുന് ജില്ലാ പ്രസിഡന്റ് വി വി രാജേഷ് തിരുവനന്തപുരം കോര്പ്പറേഷന് മേയര് സ്ഥാനാര്ത്ഥി. രാജേഷിനെ മേയര് സ്ഥാനാര്ത്ഥിയായി മത്സരിപ്പിക്കാന് പാര്ട്ടി തീരുമാനിച്ചുവെന്ന് ബിജെപി സംസ്ഥാന ജനറല് സെക്രട്ടറി എസ് സുരേഷ് പ്രഖ്യാപിച്ചു. ഇന്നലെ വരെ മുന് ഡിജിപി ആര് ശ്രീലേഖയുടെ പേരിനായിരുന്നു മുന്തൂക്കം. രാവിലെ ഉണ്ടായ നാടകീയ നീക്കങ്ങളെത്തുടര് ന്നാണ് തിരുവനന്തപുരം മേയര് സ്ഥാനത്ത് ട്വിസ്റ്റ് ഉണ്ടാകുന്നത്.
തുടര്ച്ചയായ രണ്ടാം തവണയാണ് വി വി രാജേഷ് തിരുവനന്തപുരം കോര്പ്പറേഷന് കൗണ്സിലര് ആകുന്നത്. കൊടുങ്ങാനൂര് ഡിവിഷനില് നിന്നാണ് രാജേഷ് വിജയിച്ചത്.
ആശാ നാഥ് ഡെപ്യൂട്ടി മേയര് സ്ഥാനാര്ത്ഥിയാകും. നാളെയാണ് കോര്പ്പറേഷനില് മേയര്, ഡെപ്യൂട്ടി മേയര് തെരഞ്ഞെടുപ്പ് നടക്കുക. 101 അംഗ നഗരസഭയില് ബിജെപിക്ക് 50 സീറ്റുകളാണ് ലഭിച്ചത്. രണ്ട് സ്വതന്ത്രരുടെ പിന്തുണയും ബിജെപി ഉറപ്പാക്കിയതായും സൂചനയുണ്ട്.
