കണ്ണൂർ: കണ്ണൂരിൽ കാർ മറിഞ്ഞ് 17 വയസ്സുകാരനായ വിദ്യാർഥി മരിച്ചത് നാടിന് നടുക്കമായി. മാറനാറാത്ത് കാക്കത്തുരുത്തി റോഡിനു സമീപം കാർ റോഡരികിലെ താഴ്ചയിലേക്ക് മറിഞ്ഞാണ് വിദ്യാർഥി അതിദാരുണമായി മരിച്ചത്. നാറാത്ത് യുപി സ്‌കൂളിനു സമീപം ഡാനിഷ് (17) ആണ് മരിച്ചത്. കാറിലുണ്ടായിരുന്ന സഫ്വാൻ, സൈൻ, ഷിബിൻ എന്നിവർ ആശുപത്രിയിൽ ചികിത്സയിലാണ്.
ചൊവ്വാഴ്ച രാത്രി 8:30 ഓടെയാണ് അപകടം. പുതിയതെരു ഭാഗത്തുനിന്നു കമ്പിൽ ഭാഗത്തേക്കു പോകുകയായിരുന്ന കാറാണ് അപകടത്തിൽപെട്ടത്. നിയന്ത്രണംവിട്ട കാർ റോഡിരികിലെ വലതു ഭാഗത്തെ താഴ്ചയിലേക്ക് പതിക്കുകയായിരുന്നു.
ശബ്ദം കേട്ടെത്തിയ പരിസരവാസികളാണ് കാറിനുള്ളിൽനിന്നു നാലുപേരെയും രക്ഷപ്പെടുത്തി കണ്ണൂർ എകെജി ആശുപത്രിയിൽ എത്തിച്ചത്. നില ഗുരുതരമായതിനെ തുടർന്ന് രണ്ടുപേരെ ചാലയിലെ സ്വകാര്യ ആശുപത്രിയിലേക്ക് മാറ്റിയിരുന്നു. ബുധനാഴ്ച രാവിലെയാണ് അതിതീവ്ര പരിചരണ വിഭാഗത്തിൽ ഡാനിഷ് മരണപ്പെട്ടത്.
മയ്യിൽ കയരളം സ്വദേശി അബ്ദുൽ ഖാദറിന്റെയും നാറാത്ത് യുപി സ്‌കൂളിനു സമീപത്തെ സമീറയുടെയും മകനാണ്. മൃതദേഹം പോസ്റ്റ് മോർട്ടം നടപടികൾക്കായി മയ്യിൽ പോലീസ് ഇൻക്വസ്റ്റ് നടത്തിയതിനു ശേഷം കണ്ണൂർ ജില്ലാ ആശുപത്രി മോർച്ചറിയിലേക്ക് മാറ്റി.
സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. കുട്ടി ഡ്രൈവർമാർക്കെതിരെ പോലീസ് നടപടി ശക്തമാക്കിയിരിക്കെയാണ് വീണ്ടും അപകടമരണമുണ്ടായിരിക്കുന്നത്. ഡാനിഷിന്റെ മരണത്തിൽ നടുങ്ങിയിരിക്കുകയാണ് നാറാത്ത് ഗ്രാമം.
