കോഴിക്കോട് : ബേപ്പൂര് തീരത്തിന് സമീപം അറബിക്കടലില് ചരക്ക് കപ്പലിലുണ്ടായ വന് തീപിടുത്തം മണിക്കൂറുകള് കഴിഞ്ഞിട്ടും നിയന്ത്രണവിധേയമാ ക്കാനായില്ല. പ്രതികൂല സാഹചര്യത്തെ തുടര്ന്ന് തീ അണയ്ക്കാനുള്ള ശ്രമം താത്കാലികമായി നിര്ത്തിവെച്ചു.
കപ്പല് നീങ്ങുന്നതും കടലില് കണ്ടെയ്നറുകള് ഉള്ളതും ദൗത്യത്തിന് തടസമെന്നാണ് വിവരം. നാളെ കാലത്ത് ദൗത്യം പുനരാരംഭിക്കും. രാത്രി ദൗത്യത്തിന് തടസങ്ങള് ഏറെയാണ് അതേസമയം, കപ്പലില് നിന്ന് രക്ഷപ്പെടുത്തിയ 18 പേരെ മംഗളൂരു തുറമുഖത്തെത്തിക്കും. ഇതില് രണ്ട് പേരുടെ പരുക്ക് ഗുരുതരമെന്നാണ് വിവരം.
22 പേരില് നാല് പേരെയാണ് കാണാതായത്. കൊളംബോയില് നിന്ന് നവി മുംബൈയിലേക്ക് പോയ സിംഗപ്പൂര് കപ്പലാണ് ഉച്ചയ്ക്ക് പന്ത്രണ്ടരയോടെ അറബിക്കടലില് അപകടത്തില്പ്പെട്ടത്.
നാവികസേനയുടെയും കോസ്റ്റ്ഗാര്ഡിന്റെയും നേതൃത്വത്തിലാണ് രക്ഷാദൗത്യം പുരോഗമിക്കുന്നത്. കപ്പലിലുള്ളത് നാല് തരം രാസവസ്തുക്കളെന്ന് അഴീക്കല് പോര്ട്ട് ഓഫീസര് ക്യപ്റ്റന് അരുണ്കുമാര് പറഞ്ഞു. കപ്പലില് നിന്ന് ഇരുപതോളം കണ്ടെയ്നറുകള് കടലിലേക്ക് പതിച്ചെന്നാണ് റിപ്പോര്ട്ട്.
