ലൈഫ് മിഷൻ അഴിമതി കേസ്; സ്വപ്ന സുരേഷ് ഉൾപ്പെടെ…

കൊച്ചി: വടക്കാഞ്ചേരി ലൈഫ് മിഷൻ അഴിമതി കേസിൽ ആദ്യഘട്ട കുറ്റപത്രം സമർപ്പിച്ച് സിബിഐ. സ്വപ്ന സുരേഷ് ഉൾപ്പെടെ ആറു പ്രതികൾക്കെതിരെയാണ് എറണാകുളം സി.ജെ.എം കോടതിയിൽ കുറ്റപത്രം സമർപ്പിച്ചത്. പ്രളയ ബാധിതർക്കായി ഫ്ലാറ്റ് നിർമിക്കുന്നതിനായി യു.എ.ഇയിലെ റെഡ് ക്രസന്റുമായി ഉണ്ടാക്കിയ കരാർ പ്രകാരം ലഭിച്ച തുകയിൽ നിന്ന് 4 കോടി രൂപ പ്രതികൾ കമ്മീഷനായി തട്ടിയെടുത്തുവെന്നാണ് സിബിഐയുടെ കണ്ടെത്തൽ.

ആദ്യഘട്ട കുറ്റപത്രത്തിൽ മുൻ മുഖ്യമന്ത്രി പിണറായി വിജയന്റെ പ്രിൻസിപ്പൽ സെക്രട്ടറിയായിരുന്ന എം. ശിവശങ്കറുടെ പേര് ഉൾപ്പെടുത്തിയിട്ടില്ല. കേരളത്തിൽ വലിയ വിവാദമായ നയതന്ത്ര സ്വർണക്കടത്ത് കേസ് അന്വേഷണം പുരോഗമിക്കുന്നതിനിടെയാണ് വടക്കാഞ്ചേരി ലൈഫ് മിഷൻ പദ്ധതിയിലെ ക്രമക്കേടുമായി ബന്ധപ്പെട്ട വിവരങ്ങൾ പുറത്തുവന്നത്. ചട്ടങ്ങൾ മറികടന്ന് വിദേശ സംഭാവന സ്വീകരിച്ചതും ടെൻഡർ നടപടികളില്ലാതെ യുണിടെക് എന്ന സ്ഥാപനത്തിന് നിർമാണ കരാർ നൽകിയതും സംബന്ധിച്ച പരാതിയിലായിരുന്നു സിബിഐ അന്വേഷണം. യു.എ.ഇയിലെ സന്നദ്ധ സംഘടനയായ റെഡ് ക്രസന്റുമായി ലൈഫ് മിഷൻ ഒപ്പുവെച്ച കരാർ പ്രകാരം 21 കോടി ലഭിച്ചിരുന്നു. ഇതിൽ 4 കോടി കമ്മീഷനായി തട്ടിയെടുത്തുവെന്നാണ് സിബിഐ കുറ്റപത്രത്തിലെ കണ്ടെത്തൽ. യുണിടെക് ഉടമ സന്തോഷ് ഈപ്പൻ 5 കോടി കൈക്കലാക്കിയതായും കുറ്റപത്രത്തിൽ പറയുന്നു.

സന്തോഷ് ഈപ്പനെയാണ് ഒന്നാം പ്രതിയാക്കിയത്. അദ്ദേഹത്തിന്റെ കമ്പനിയായ സെയ്ൻ വെഞ്ചേഴ്‌സ് രണ്ടാം പ്രതിയും ലൈഫ് മിഷൻ മൂന്നാം പ്രതിയുമാണ്. നയതന്ത്ര സ്വർണക്കടത്ത് കേസിലെ പ്രതികളായ സന്ദീപ് വാര്യർ, സ്വപ്ന സുരേഷ്, സരിത് എന്നിവരാണ് മറ്റ് പ്രതികൾ. എം. ശിവശങ്കർ കേസിലെ ഏഴാം പ്രതിയാണെങ്കിലും ആദ്യഘട്ട കുറ്റപത്രത്തിൽ ഉൾപ്പെടുത്തിയിട്ടില്ല. എം. ശിവശങ്കറെയും മുൻ ലൈഫ് മിഷൻ സി.ഇ.ഒ യു.വി. ജോസിനെയും കേന്ദ്രീകരിച്ചുള്ള അന്വേഷണം തുടരുകയാണെന്ന് സിബിഐ അറിയിച്ചു. ശിവശങ്കർ ഉൾപ്പെടെയുള്ള കൂടുതൽ പ്രതികളെ ഉൾപ്പെടുത്തി പിന്നീട് അനുബന്ധ കുറ്റപത്രം സമർപ്പിക്കുമെന്നും സിബിഐ വ്യക്തമാക്കുന്നു.