മൂന്നാര്‍: വിനോദ സഞ്ചാരികളുടെ ഇഷ്ടകേന്ദ്രമായ മാട്ടുപ്പെട്ടി ഡാമിലെ പെട്രോള്‍ ബോട്ടുകള്‍ ഇല്ക്ട്രിക്കിലേക്ക് മാറുന്നു. വിനോദ സഞ്ചാരികളെ ആകര്‍ഷിക്കുന്നതിനും ടൂറിസം മേഖല കൂടുതല്‍ പ്രകൃതി സൗഹാര്‍ദ്ദമാക്കുന്നതി നുമായി കേരള ഹൈഡല്‍ ടൂറിസം സെന്റര്‍റാണ് പദ്ധതി നടപ്പിലാക്കുന്നത്.
ബാറ്ററികള്‍ സൗരോര്‍ജ്ജം ഉപയോഗിച്ച് ചാര്‍ജ് ചെയ്ത് പ്രവര്‍ത്തിപ്പിക്കുന്നതാണ് പദ്ധതി. ഇതുവഴി ബോട്ടുകള്‍ സമ്പൂര്‍ണ്ണ പ്രകൃതി സൗഹൃദമാകും. 11 കിലോവാട്ട് ശേഷിയുള്ള അക്വാമോട്ട് ഇലക്ട്രിക് ഔട്ട്‌ബോര്‍ഡും 28 കിലോ വാട്ട് ശേഷിയുമുള്ള മോട്ടോറുമാണ് ബോട്ടില്‍ സജ്ജീകരിച്ചിരിക്കുന്നത്.
പ്രതിദിനം 6500 ലിറ്റര്‍ പെട്രോളും പ്രതിവര്‍ഷം 7,00,000 രൂപയും ഇതിലൂടെ ലാഭിക്കാനാകും. കൂടാതെ പ്രതിവര്‍ഷം 15 ടണ്‍ കാര്‍ബണ്‍ ഡൈഓക്‌സൈഡ് പുറന്തള്ളുന്നതും ഇത് തടയുന്നു.
സഞ്ചരികള്‍ക്ക് പ്രകൃതി ഭംഗി ആസ്വദിച്ച് പ്രകൃതി സൗഹാര്‍ദ്ദ ബോട്ടില്‍ യാത്ര ചെയ്യാം എന്നതാണ് പദ്ധതിയുടെ പ്രത്യേകത. ഒരേ സമയം 20 വിനോദ സഞ്ചാരികള്‍ക്ക് 30 മിനിറ്റ് വരെ ബോട്ടില്‍ സഞ്ചരിക്കാനാകും.
പരീക്ഷണ അടിസ്ഥാനത്തിലാണ് ഈ പദ്ധതി നടപ്പിലാക്കുന്നത്. പദ്ധതിയുടെ വിജയത്തോടെ കൂടുതല്‍ ബോട്ടുകളുടെ എന്‍ജിനുകള്‍ ഇലക്ട്രിക്ക് സംവിധാനത്തിലേക്ക് മാറ്റും.
എട്ട് വര്‍ഷം കൊണ്ട് പദ്ധതിക്കായി ചിലവായ തുക തിരിച്ചെടുക്കാനാകും.
ഇലക്ട്രിക്ക് ബോട്ടുകള്‍ ഉപയോഗിക്കുന്നതിലൂടെ ജല മലിനീകരണം, വായു മലിനീകരണം, ശബ്ദ മലിനീകരണം എന്നിവയും പൂര്‍ണ്ണമായും ഒഴിവാകും. വിനോദ സഞ്ചാരികള്‍ക്ക് https://www.keralahydeltourism.com എന്ന വെബ്‌സൈറ്റ് വഴി സന്ദര്‍ശന ടിക്കറ്റുകള്‍ ബുക്ക് ചെയ്യാം. രാവിലെ 9.30 മുതല്‍ 5 വരെയാണ് പ്രവര്‍ത്തന സമയം.
