കൊച്ചി: എറണാകുളം ജില്ലയിലെ മുളന്തുരുത്തി അരയന്കാവിന് സമീപം വാഹനാപകടത്തില് രണ്ടുപേര് മരിച്ചു. കാഞ്ഞിരമറ്റം സ്വദേശികളായ ജോയല് ജോസഫ് ആന്റണി, നിസാം എന്നിവരാണ് മരിച്ചത്.
അരയന്കാവിന് സമീപം ഇന്നലെ രാത്രി പത്തരയോടെ ആയിരുന്നു അപകടം. എതിര്ദിശകളില് വന്ന കാറും സ്കൂട്ടറും കൂട്ടിയിടിച്ചാണ് അപകടമുണ്ടായത്. ബൈക്ക് യാത്രക്കാരാണ് മരിച്ചത്.
കാറിലിടിച്ച സ്കൂട്ടര് സമീപത്തെ മതിലില് ഇടിച്ച് മറിഞ്ഞു. ഗുരുതരമായി പരിക്കേറ്റ ഒരാള് ഇന്നലെ ആശുപത്രിയിലേക്ക് കൊണ്ടുപോകും വഴി മരിച്ചു. രണ്ടാമത്തെയാള് ഇന്നു പുലര്ച്ചെ ചികിത്സയിലിരിക്കെയാണ് മരിച്ചത്.
