കാസര്കോട്: റിയാസ് മൗലവി വധക്കേസിൽ മൂന്ന് പ്രതികളെയും വെറുതെ വിട്ടു. കാസര്കോട് ജില്ലാ പ്രിൻസിപ്പല് സെഷൻസ് കോടതിയുടേതാണ് വിധി.
കേളുഗുഡെ സ്വദേശികളായ അജേഷ്, നിതിന് കുമാര്, അഖിലേഷ് എന്നിവരെയാണ് കോടതി വെറുതെ വിട്ടത്. മൂന്ന് പേരും ആര്എസ്എസ് പ്രവര്ത്തകരാണ്. ജില്ലാ പ്രിന്സിപ്പല് സെഷന്സ് കോടതി ജഡ്ജി കെ.കെ ബാലകൃഷ്ണനാണ് കേസ് പരിഗണിച്ചത്. കേസിൽ ഇതുവരെ ജാമ്യം ലഭിക്കാത്തതിനാല് പ്രതികള് ഏഴുവര്ഷക്കാലമായി ജയിലില് തന്നെയാണ്.
2017 മാര്ച്ച് 20 നാണ് കാസര്കോട് ചൂരി മദ്രസയിലെ അധ്യാപകനായ റിയാസ് മൗലവി കൊല്ലപ്പെടുന്നത്. ചൂരി പള്ളിയില് അതിക്രമിച്ച് കയറിയ പ്രതികള് കുടക് സ്വദേശിയായ റിയാസ് മൗലവിയെ വെട്ടിക്കൊല്ലുകയായിരുന്നു.
കൊല നടന്ന് മൂന്ന് ദിവസത്തിനകം കുറ്റവാളികള് പിടിക്കപ്പെട്ടു. 90 ദിവസത്തിനകം കേസിൽ കുറ്റപത്രവും സമര്പ്പിച്ചിരുന്നു. കേസിന്റെ വിചാരണവേളയില് 97 സാക്ഷികളെ കോടതി വിസ്തരിച്ചു. 215 രേഖകളും 45 തൊണ്ടിമുതലുകളും കോടതിയിൽ സമർപ്പിച്ചു.
കണ്ണൂര് ക്രൈംബ്രാഞ്ച് എസ്.പിയായിരുന്ന ഡോ. എ. ശ്രീനിവാസിന്റെ മേല്നോട്ടത്തില് അന്നത്തെ ഇന്സ്പെക്ടര് പി.കെ സുധാകരന്റെ നേതൃത്വത്തിലുള്ള പ്രത്യേക അന്വേഷണ സംഘമാണ് കേസ് അന്വേഷിച്ചത്.
