കോട്ടയം/ഇടുക്കി : മീനച്ചില് താലൂക്കില് വേളത്തുശ്ശേരിയിലുണ്ടായ മണ്ണടിച്ചിലില് ചെന്നൈ സ്വദേശിനി സംഗീത അരുള് ലാല്(35) മരിച്ചു. വാഗമണില്നിന്ന് സ്കൂട്ടറില് മടങ്ങുമ്പോഴാണ് മണ്ണിടിച്ചിലിൽപ്പെട്ടത്. വാഗമൺ- ഈരാറ്റുപേട്ട റോഡിൽ ഗതാഗതം തടസ്സപ്പെട്ടു.
ഇടുക്കി ജില്ലയിൽവട്ടവടയിലാണ് കനത്ത മഴയെത്തുടർന്നുണ്ടായ മണ്ണിടിച്ചിലിൽ രണ്ടു മരണം സംഭവിച്ചത്. വട്ടവട കൊട്ടാമ്പൂരിലാണ്(കൊട്ടക്കമ്പൂർ) കനത്ത മഴയെത്തുടർന്നുണ്ടായ ദാരുണമായ മണ്ണിടിച്ചിലിൽ ഷെഡിന് മുകളിലേക്ക് മണ്ണ് വീണ് കൊട്ടക്കമ്പൂർ സ്വദേശികളായ ബാലകൃഷ്ണൻ, സഹോദരി ചിന്നു എന്നിവർ മരിച്ചത്.
ബാലകൃഷ്ണന്റെ ഭാര്യ മാരിയമ്മയെ പരിക്കേറ്റ് ആശുപത്രിയിൽ പ്രവേശിപ്പിച്ചു. തുടർച്ചയായ മൂന്ന് മണിക്കൂർ നീണ്ട ശക്തമായ മഴയ്ക്കിടെ കൃഷിയിടത്തിലെ ഷെഡിൽ അഭയം പ്രാപിച്ചപ്പോഴായിരുന്നു അപകടം.
ഇതിനുപുറമെ, വാഗമൺ, വെള്ളിക്കുളം, തീക്കോയി മേഖലകളിലും കനത്ത മഴ തുടരുന്ന സാഹചര്യത്തിൽ വാഗമൺ–ഈരാറ്റുപേട്ട റോഡിലും കാരികോട് ടോപ്പിലും മണ്ണിടിച്ചിലുണ്ടായി രണ്ട് കാറുകൾക്ക് മുകളിലേക്ക് മണ്ണ് വീണ് ഗതാഗതം തടസ്സപ്പെടുകയുണ്ടായായിട്ടുണ്ട്.
എന്നാൽ കാരികോട് ടോപ്പിൽ കാറുകൾക്ക് മുകളിലേക്ക് മണ്ണ് വീണെങ്കിലും ആർക്കും പരിക്കുകൾ പറ്റിയിട്ടില്ല. മലയോര മേഖലകളിൽ ശക്തമായ മഴ തുടരുന്നതിനാൽ മണ്ണിടിച്ചിലിനും മലവെള്ളപ്പാച്ചിലിനും സാധ്യതയുള്ളതിനാൽ അനാവശ്യ യാത്രകൾ ഒഴിവാക്കണമെന്നും, മീനച്ചിൽ ആറ്റിൽ ജലനിരപ്പ് ഉയരാൻ സാധ്യതയുള്ളതിനാൽ തീക്കോയി, ഈരാറ്റുപേട്ട, പാലാ ഉൾപ്പെടെയുള്ള വെള്ളപ്പൊക്ക സാധ്യതയുള്ള പ്രദേശങ്ങളിൽ താമസിക്കുന്നവർ ജാഗ്രത പാലിക്കണമെന്നും അധികൃതർ കർശന മുന്നറിയിപ്പ് നൽകിയിട്ടുണ്ട്.
അടിയന്തര സാഹചര്യങ്ങളിൽ എല്ലാവരും അധികൃതരുടെ നിർദ്ദേശങ്ങൾ പാലിച്ച് സുരക്ഷയ്ക്ക് മുൻഗണന നൽകണമെന്ന് അധികൃതർ അഭ്യർത്ഥിച്ചു.
