കൊച്ചി : തൻ്റെ ചിത്രം ഉപയോഗിച്ച് വിദ്യാഭ്യാസ തട്ടിപ്പ് നടത്തിയെന്നും മുന്നൂറിലധികം കുട്ടികള് ഇരയായെന്നും നടി ഗായത്രി അരുൺ
എറണാകുളത്ത് പ്രവര്ത്തിക്കുന്ന വിദ്യാഭ്യാസ സ്ഥാപനത്തിനെതിരെയാണ് പരാതിയുമായി നടി ഗായത്രി അരുൺ രംഗത്ത് എത്തിയിരിക്കുന്നത്.
ഇന്സ്റ്റിറ്റ്യൂട്ടില് പണം അടച്ച് മുന്നൂറിലധികം വിദ്യാര്ത്ഥികള് പറ്റിക്കപ്പെട്ടിട്ടുണ്ടെന്നും തന്റെ ചിത്രമാണ് സ്ഥാപനം മാര്ക്കറ്റിംഗിന് ഉപയോഗിച്ചതെന്നും ഗായത്രി അരുണ് ആരോപിക്കുന്നു .
ഫേസ്ബുക്കില് പങ്കുവെച്ച വീഡിയോയിലൂടെയാണ് നടി വിദ്യാഭ്യാസ തട്ടിപ്പിനെതിരെ മുന്നറിയിപ്പ് നല്കിയത്. പറ്റിക്കപ്പെട്ട വിദ്യാര്ത്ഥികള് ഉടന് തന്നെ നിയമപരമായി മുന്നോട്ടുപോകണമെന്നും തട്ടിപ്പ് നടത്തിയവരെ നിയമത്തിന് മുന്നില് കൊണ്ടുവരണമെന്നും ഗായത്രി അരുണ് പറഞ്ഞു.
സ്ഥാപനത്തിന്റെ പേര് വെളിപ്പെടുത്താതെയാണ് നടി ഇക്കാര്യം പറഞ്ഞത്. അനുവാദമില്ലാതെ തന്റെ ചിത്രം ഉപയോഗിച്ചതിന് സ്ഥാപനത്തിന് നോട്ടീസയച്ചിട്ടുണ്ടെന്നും അവര് വ്യക്തമാക്കി.
‘2024 സെപ്റ്റംബര് മൂന്നാം തിയതി കൊച്ചിയിലുളള ഒരു ഓണ്ലൈന് ഇന്സ്റ്റിറ്റ്യൂട്ട് ഞാന് ഉദ്ഘാടനം ചെയ്തിരുന്നു. മറ്റ് പല പ്രമുഖരും അതിലുണ്ടായിരുന്നു. കഴിഞ്ഞ കുറച്ച് നാളുകളായി ഈ സ്ഥാപനത്ഥിനെതിരെ നിരവധി പരാതികള് വരുന്നുണ്ട്.
പൈസ അടച്ച് പറ്റിക്കപ്പെട്ടു എന്ന് പറഞ്ഞ് കുട്ടികള് സ്ക്രീന്ഷോട്ട് ഉള്പ്പെടെ എനിക്ക് അയയ്ക്കുകയാണ്. എന്റെ ഫോട്ടോയാണ് എന്റെ അനുവാദമില്ലാതെ ഇവര് ബിസിനസിന് ഉപയോഗിക്കുന്നത്. ഇത് എന്റെ അറിവോട് കൂടിയല്ല. അതുകൊണ്ട് നിയമപരമായി ഞാന് നോട്ടീസയച്ചിരിക്കുകയാണ്.
എനിക്കൊപ്പം അന്ന് ഉദ്ഘാടനത്തില് പങ്കെടുത്ത കൊച്ചിയിലെ തന്നെ ഒരു രാഷ്ട്രീയ നേതാവിനെയും വിവരം അറിയിച്ചിട്ടുണ്ട്. അദ്ദേഹവും നടപടികള് എടുത്തോളാം എന്ന് എനിക്ക് ഉറപ്പുനല്കിയിട്ടുണ്ടെന്ന് ഗായത്രി പറഞ്ഞു.
തൻ്റെ ചിത്രം ഉപയോഗിച്ച് വിദ്യാഭ്യാസ തട്ടിപ്പ് നടത്തിയെന്നും മുന്നൂറിലധികം കുട്ടികള് ഇരയായെന്നും നടി ഗായത്രി അരുൺ
