മാവേലിക്കര : ആലപ്പുഴയിലെ ബിജെപി നേതാവായിരുന്ന രഞ്ജിത്ത് ശ്രീനിവാസനെ കൊലപ്പെടുത്തിയ പ്രതികളായ 15 പേരും കുറ്റക്കാരെന്ന് കോടതി. മാവേലിക്കര അഡീഷണല് സെഷന്സ് കോടതി ജഡ്ജി വി ജി ശ്രീദേവിയാണ് വിധി പ്രസ്താവിച്ചത്. ഗൂഢാലോചനയിൽ എല്ലാ പ്രതികൾക്കും പങ്കുണ്ടെന്നും കോടതി കണ്ടെത്തി. എട്ടുപേര് കൊലപാതകത്തിൽ നേരിട്ട് പങ്കെടുത്തു.
2021 ഡിസംബർ 19നാണ് കൊലപാതകം നടന്നത്. ആലപ്പുഴ വെള്ളക്കിണറിലെ വീട്ടില് കയറി അമ്മയുടേയും ഭാര്യയുടേയും മകളുടേയും മുമ്പിന് വെച്ച് എസ്ഡിപിഐ പ്രവര്ത്തകര് വെട്ടിക്കൊലപ്പെടുത്തുകയായിരുന്നു. വയലാര് സ്വദേശിയായ നന്ദു കൃഷ്ണയെ കൊലപ്പെടുത്തിയപ്പോള് തന്നെ പ്രതികാരക്കൊല നടക്കുമെന്ന് എസ്ഡിപിഐക്കാരായ പ്രതികള് മുന്കൂട്ടി കണ്ടിരുന്നുവെന്നും അങ്ങനെ സംഭവിച്ചാല് പകരം ഒരാളെ കൊലപ്പെടുത്താന് നേരത്തെ തന്നെ തീരുമാനിച്ചിരുന്നുവെന്നും പ്രോസിക്യൂഷന് കോടതിയില് പറഞ്ഞിരുന്നു. മാവേലിക്കര ജില്ലാ ജയിലിലാണ് പ്രതികള് ഇപ്പോൾ.
ആലപ്പുഴ ഡിവൈഎസ്പി എന് ആര് ജയരാജ് അന്വേഷണം പൂര്ത്തിയാക്കി കുറ്റപത്രം സമര്പ്പിച്ച കേസില് ആയിരത്തോളം രേഖകളും നൂറിലധികം തൊണ്ടിമുതലുകളും തെളിവായി ഹാജരാക്കി. വിരലടയാളങ്ങള്, ശാസ്ത്രീയ തെളിവുകള്, സിസിടിവി ദൃശ്യങ്ങള്, ഗൂഗിള് മാപ്പിന്റെ സഹായത്തോടെ തയ്യാറാക്കിയ റൂട്ടുമാപ്പുകള് തുടങ്ങിയ തെളിവുകളും കേസില് ഹാജരാക്കി.
ശിക്ഷാവിധി തിങ്കളാഴ്ച ഉണ്ടാകും.
