ന്യൂഡൽഹി : മുതിര്ന്ന കോണ്ഗ്രസ് നേതാവും അന്തരിച്ച മുന് മുഖ്യമന്ത്രി കെ കരുണാകരന്റെ മകളുമായ പത്മജ വേണുഗോപാല് ബിജെപിയില് ചേര്ന്നു.
ന്യൂഡൽഹിയിലെ പാര്ട്ടി ആസ്ഥാനത്തെത്തിയാണ് പത്മജ വേണുഗോപാല് ബിജെപി അംഗത്വം സ്വീകരിച്ചത്. പ്രകാശ് ജാവദേക്കറുടെ വീട്ടിലെത്തി ചര്ച്ച നടത്തിയതിന് ശേഷമാണ് ബിജെപി ഓഫീസിലെത്തിയത്.
തുടര്ച്ചയായ അവഗണനയിൽ മനം മടുത്താണ് കോണ്ഗ്രസ് വിടുന്നതെന്ന് പത്മജ വേണുഗോപാല് പ്രതികരിച്ചത്. വേദനയോടെയാണ് പാര്ട്ടി വിടുന്നത്. കോണ്ഗ്രസുകാര് തന്നെ ബിജെപിയാക്കി. കെ.മുരളീധരന്റെ വിമര്ശനങ്ങള് കേൾക്കുമ്പോൾ ചിരിയാണ് വരുന്നതെന്നും പത്മജ പറഞ്ഞു.
കോൺഗ്രസിൽ നിന്ന് കുറേ വർഷങ്ങളായി അവഗണന നേരിടുകയാണ്. താനും പിതാവ് കെ. കരുണാകരനും പാർട്ടിയിൽ അസംതൃപ്തരായിരുന്നു. കഴിഞ്ഞ നിയമസഭ തെരഞ്ഞെടുപ്പിലെ പരാജയത്തിന് പിന്നാലെ രാഷ്ട്രീയം അവസാനിപ്പിക്കാൻ തീരുമാനിച്ചിരുന്നു. തെരഞ്ഞെടുപ്പ് പരാജയം സംബന്ധിച്ച് പരാതി നൽകിയെങ്കിലും പാർട്ടി നേതൃത്വം പരിഹാരം കണ്ടില്ല. തന്റെ പരാതി ചവറ്റുകൊട്ടയിൽ പോയെന്നാണ് അറിയാൻ കഴിഞ്ഞതെന്നും പത്മജ പറഞ്ഞു.
