പൂനെ : വിദേശ വേദികളിൽ ഇന്ത്യയെ അപകീർത്തിപ്പെടുത്തിയാൽ അധികാരത്തിലെത്താനാകില്ലെന്ന് ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധിയെ ഓർമിപ്പിച്ച് കേന്ദ്ര ആഭ്യന്തരമന്ത്രി അമിത് ഷാ.
വിദേശയാത്രകൾ അവസാനിപ്പിച്ച് രാജ്യത്തെ ഗ്രാമങ്ങളിലെത്തി ജനങ്ങളുടെ പ്രശ്നങ്ങൾ മനസ്സിലാക്കാനാണ് രാഹുൽ ശ്രമിക്കേണ്ടതെന്നും അദ്ദേഹം ഉപദേശിച്ചു. ഞായറാഴ്ച മഹാരാഷ്ട്രയിലെ പൂനെയിൽ ദേശീയ ഹെവി എൻജിനീയറിങ് സഹകരണ മേഖലയുമായി ബന്ധപ്പെട്ട പുനരുജ്ജീവന പദ്ധതിയുടെ തറക്കല്ലിടൽ ചടങ്ങിൽ സംസാരിക്കുകയായിരുന്നു അമിത് ഷാ.
ഹൈദരാബാദിൽ നവംബർ 13, 14 തീയതികളിൽ നടന്ന ഭാരത് ഉച്ചകോടിയിൽ രാഹുൽ ഗാന്ധി നടത്തിയ പ്രസംഗങ്ങളെയും അദ്ദേഹം വിമർശിച്ചു. ഇന്ത്യയുടെ ജനാധിപത്യത്തെയും പ്രധാനമന്ത്രി നരേന്ദ്ര മോദിയുടെ വികസന പ്രവർത്തനങ്ങളെയും അന്താരാഷ്ട്ര വേദികളിൽ വിമർശിക്കുന്നത് രാജ്യത്തിന്റെ പ്രതിച്ഛായയെ ബാധിക്കുമെന്നാണ് അമിത് ഷായുടെ ആരോപണം.
കോൺഗ്രസ് തുടർച്ചയായ തിരഞ്ഞെടുപ്പ് പരാജയങ്ങളിൽ നിരാശപ്പെട്ടാണ് ഇത്തരം നിലപാടുകൾ സ്വീകരിക്കുന്നതെന്നും അമിത് ഷാ സൂചിപ്പിച്ചു. 2004 മുതൽ 2014 വരെയുള്ള കോൺഗ്രസ് ഭരണകാലത്ത് 12 ലക്ഷം കോടി രൂപയുടെ അഴിമതി നടന്നുവെന്നും അദ്ദേഹം വ്യക്തമാക്കി.
അതേസമയം, മോദി സർക്കാരിന്റെ 12 വർഷത്തെ ഭരണത്തിൽ പ്രധാനമന്ത്രിക്കെതിരെ അഴിമതിയുടെ ചെറിയ ആരോപണം പോലും ഉയർന്നിട്ടില്ലെന്നും ഷാ പറഞ്ഞു.
കൃഷി, വ്യവസായം, ബഹിരാകാശ ഗവേഷണം, സ്റ്റാർട്ടപ്പ് മേഖല, റെയിൽവേ, വ്യോമയാനം, വിദ്യാഭ്യാസം തുടങ്ങിയ മേഖലകളിൽ രാജ്യം വലിയ പുരോഗതി കൈവരിച്ചതായും അദ്ദേഹം ചൂണ്ടിക്കാട്ടി. ചന്ദ്രന്റെ ദക്ഷിണധ്രുവത്തിലെ ഇന്ത്യയുടെ നേട്ടം, വിമാനത്താവളങ്ങളുടെ എണ്ണം 76ൽ നിന്ന് 150 ആയി ഉയർന്നത്, ദേശീയ വിദ്യാഭ്യാസ നയം, പ്രത്യേക സഹകരണ മന്ത്രാലയത്തിന്റെ രൂപീകരണം എന്നിവയും അദ്ദേഹം എടുത്തുപറഞ്ഞു.
അതേസമയം, ഭാരത് ഉച്ചകോടിയിൽ രാഹുൽ ഗാന്ധി ഇന്ത്യയിലെ ജനാധിപത്യം 2014ൽ തകർന്നുവെന്നും തിരഞ്ഞെടുപ്പ് സംവിധാനത്തിൽ വലിയ മാറ്റങ്ങൾ ഉണ്ടായെന്നും ആരോപിച്ചിരുന്നു. 2024ലെ ലോക്‌സഭാ തിരഞ്ഞെടുപ്പിൽ വോട്ട് ചെയ്ത 14 കോടി ആളുകളെ പിന്നീട് ഇല്ലാത്ത വോട്ടർമാരോ വോട്ട് ചെയ്യാത്തവരോ ആയി കണക്കാക്കിയെന്ന ആരോപണവും അദ്ദേഹം ഉന്നയിച്ചു. ഇതിന് പിന്നാലെയാണ് അമിത് ഷായുടെ വിമർശനം ശക്തമായത്.
രാഷ്ട്രീയ പാർട്ടികൾ തമ്മിൽ അഭിപ്രായവ്യത്യാസങ്ങൾ ഉണ്ടാകാമെങ്കിലും അന്താരാഷ്ട്ര വേദികളിൽ രാജ്യത്തിന്റെ വിശ്വാസ്യതയെ ചോദ്യം ചെയ്യരുതെന്നും അദ്ദേഹം പറഞ്ഞു. നിലവിലെ രാഷ്ട്രീയ നിലപാടുമായി മുന്നോട്ടുപോയാൽ അടുത്ത 30 വർഷത്തേക്കും കോൺഗ്രസിന് അധികാരത്തിലെത്താൻ കഴിയില്ലെന്നും പാർട്ടി പ്രവർത്തകർ നേതൃത്വത്തിന്റെ പ്രവർത്തനങ്ങളെക്കുറിച്ച് ചിന്തിക്കണമെന്നും അമിത് ഷാ കൂട്ടിച്ചേർത്തു.
