കൊല്ലം: ചടയമംഗലത്ത് പതിമൂന്നുകാരനായ ബാലന് രണ്ടാനച്ഛന്റെ ക്രൂരമർദനമേറ്റ സംഭവത്തിൽ സംസ്ഥാന ബാലാവകാശ സംരക്ഷണ കമ്മിഷൻ സ്വമേധയാ കേസെടുത്തു.
കുട്ടിക്കെതിരെ നടന്ന അതിക്രമം മാധ്യമങ്ങളിലൂടെ പുറത്തുവന്നതിന് പിന്നാലെയാണ് കമ്മിഷൻ വിഷയത്തിൽ അടിയന്തരമായി ഇടപെട്ടിരിക്കുന്നത്. സംഭവത്തിൽ ചടയമംഗലം പോലീസിനോടും ജില്ലാ ശിശുസംരക്ഷണ ഓഫീസറോടും കമ്മിഷൻ അടിയന്തരമായി വിശദമായ റിപ്പോർട്ട് തേടിയിട്ടുണ്ട്.
കുട്ടിയുടെ സുരക്ഷയും സംരക്ഷണവും പൂർണ്ണമായും ഉറപ്പാക്കുന്നതിന് ആവശ്യമായ അടിയന്തര നടപടികൾ സ്വീകരിക്കാൻ ബാലാവകാശ കമ്മിഷൻ ബന്ധപ്പെട്ട ഉദ്യോഗസ്ഥർക്ക് കർശന നിർദ്ദേശം നൽകി. മർദനമേറ്റ കുട്ടിക്ക് ആവശ്യമായ വൈദ്യസഹായവും മാനസിക പിന്തുണയും ഉറപ്പാക്കണമെന്നും നിർദ്ദേശമുണ്ട്.
കുട്ടികൾക്കെതിരായ ഇത്തരം ക്രൂരതകൾ ഒരു കാരണവശാലും വെച്ചുപൊറുപ്പിക്കാനാവില്ലെന്നും കുറ്റക്കാർക്കെതിരെ കർശനമായ നിയമനടപടി ഉണ്ടാകുമെന്നും കമ്മിഷൻ വ്യക്തമാക്കി.
സംഭവത്തിൽ ചടയമംഗലം പോലീസ് നേരത്തെ തന്നെ കേസെടുത്ത് അന്വേഷണം ആരംഭിച്ചിരുന്നു. രണ്ടാനച്ഛന്റെ നിരന്തരമായ ശാരീരിക ഉപദ്രവത്തെ തുടർന്ന് കുട്ടി വലിയ രീതിയിലുള്ള മാനസിക സമ്മർദ്ദത്തിലായിരുന്നുവെന്നാണ് പ്രാഥമിക വിവരം.
നാട്ടുകാരും ജനപ്രതിനിധികളും ഇടപെട്ടതോടെയാണ് കുട്ടിക്കെതിരായ ക്രൂരതകൾ പുറംലോകമറിഞ്ഞത്. പ്രതിക്കെതിരെ ജുവനൈൽ ജസ്റ്റിസ് ആക്ട് ഉൾപ്പെടെയുള്ള കർശന വകുപ്പുകൾ ചുമത്തിയിട്ടുണ്ട്.
