ശ്രീനഗര്‍: ജമ്മു കാശ്മീരിലെ സാംബ ജില്ലയിലെ അതിര്‍ത്തി ഗ്രാമത്തില്‍ സംശയാസ്പദമായ സാഹചര്യത്തില്‍ പ്രാവിനെ കണ്ടെത്തിയതില്‍ അന്വേഷണം തുടങ്ങി. പ്രാവിന്റെ കാലില്‍ ഒരു വളയവും ഉര്‍ദു കുറിപ്പും പാകിസ്ഥാന്‍ കറന്‍സിയും ഉണ്ടായിരുന്നെന്ന് ഉദ്യോഗസ്ഥര്‍ വ്യക്തമാക്കി. സംഭവത്തില്‍ സുരക്ഷാ ഏജന്‍സികള്‍ അന്വേഷണം ശക്തമാക്കി.
ശനിയാഴ്ച രാവിലെ 6.40-ഓടെയാണ് സാംബയിലെ മാവാ എന്ന അതിര്‍ത്തി ഗ്രാമത്തിലുള്ള ഒരു ക്ഷേത്രത്തിന് സമീപം പ്രാവിനെ കണ്ടെത്തിയത്. പ്രദേശവാസികളാണ് പ്രാവിന്റെ കാലില്‍ പ്രത്യേക വസ്തുക്കള്‍ കെട്ടിവെച്ച നിലയില്‍ ആദ്യം കാണുന്നത്. തുടര്‍ന്ന് നാട്ടുകാര്‍ ചേര്‍ന്ന് പ്രാവിനെ പിടികൂടുകയും ഉടന്‍തന്നെ പൊലീസില്‍ വിവരം അറിയിക്കുകയുമായിരുന്നു.
വിവരമറിഞ്ഞയുടന്‍ പൊലീസും സുരക്ഷാ ഉദ്യോഗസ്ഥരും സ്ഥലത്തെത്തി പ്രാവിനെയും അതിലുണ്ടായിരുന്ന സാധനങ്ങളും കസ്റ്റഡിയിലെടുത്തു. പ്രാവിന്റെ കാലില്‍ ഘടിപ്പിച്ചിരുന്ന വളയത്തില്‍ ‘033341214150’ എന്ന കോഡ് നമ്പര്‍ വ്യക്തമായി രേഖപ്പെടുത്തിയിട്ടുണ്ട്. ഈ വളയത്തിന് പുറമേയാണ് ഒരു ഉറുദു കുറിപ്പും പാകിസ്ഥാന്‍ കറന്‍സിയും കൂട്ടിക്കെട്ടിയിരുന്നത്.
പിടിയിലായ പ്രാവിനെ സുരക്ഷാ വിഭാഗത്തിന്റെ പ്രത്യേക കേന്ദ്രത്തിലേക്ക് മാറ്റുകയും വിദഗ്ധ പരിശോധനയ്ക്ക് വിധേയമാക്കുകയും ചെയ്തിട്ടുണ്ട്. കുറിപ്പില്‍ എന്താണ് എഴുതിയിരിക്കുന്നതെന്നും, പണവും കോഡ് നമ്പറും എന്ത് ആവശ്യത്തിനാണ് ഉപയോഗിച്ചതെന്നും കണ്ടെത്താന്‍ രഹസ്യാന്വേഷണ ഏജന്‍സികള്‍ പരിശോധന ആരംഭിച്ചു.
ജമ്മു കാശ്മീരിന്റെയും പഞ്ചാബിന്റെയും അതിര്‍ത്തി പ്രദേശങ്ങളില്‍ ചാരവൃത്തിക്കും രഹസ്യ സന്ദേശങ്ങള്‍ കൈമാറുന്നതിനും, മയക്കുമരുന്ന് ഉള്‍പ്പെടെയുള്ളവയുടെ കള്ളക്കടത്തിനും പ്രാവുകളെയും മറ്റ് പക്ഷികളെയും ഉപയോഗിക്കുന്നത് പുതിയ സംഭവമല്ല. മുന്‍പും സമാനമായ രീതിയില്‍ അതിര്‍ത്തി കടന്നെത്തിയ പക്ഷികളെ സുരക്ഷാ സേന പിടികൂടിയിട്ടുണ്ട്.
അതിനിടയില്‍, സാംബ അതിര്‍ത്തി മേഖലകളില്‍ സമാനമായ മറ്റ് സുരക്ഷാ ആശങ്കകളും റിപ്പോര്‍ട്ട് ചെയ്യപ്പെട്ടിട്ടുണ്ട്. വെള്ളിയാഴ്ച ഗൗ മന്‍ഹാസന്‍ മേഖലയിലെ അതിര്‍ത്തി പോസ്റ്റിന് സമീപം പാകിസ്ഥാന്‍ ഇന്റര്‍നാഷണല്‍ എയര്‍ലൈന്‍സിന്റെ (PIA) ചിഹ്നമുള്ള ബലൂണ്‍ കണ്ടെത്തിയിരുന്നു. ഇതിനെത്തുടര്‍ന്ന് മുന്‍കരുതല്‍ നടപടിയുടെ ഭാഗമായി പ്രദേശത്ത് വ്യാപകമായ തെരച്ചില്‍ നടത്തിയിരുന്നു.
കൂടാതെ, ഒക്ടോബര്‍ 17-ന് ജമ്മുവിലെ ഖൗര്‍ മേഖലയില്‍ നിന്നും സമാനമായ രീതിയില്‍ വിമാനത്തിന്റെ ആകൃതിയിലുള്ള പി.ഐ.എ. ബലൂണും പിടിച്ചെടുത്തിരുന്നു. അതിര്‍ത്തിക്ക് അപ്പുറത്തുനിന്നുള്ള ഇത്തരം നിഗൂഢ നീക്കങ്ങള്‍ മേഖലയില്‍ അതീവ ജാഗ്രത പാലിക്കാന്‍ സുരക്ഷാ സേനയ്ക്ക് നിര്‍ദ്ദേശം നല്‍കിയിട്ടുണ്ട്.
