കോട്ടയം : ശക്തമായ ഒരു മഴ പെയ്താൽ വെള്ളക്കെട്ടായി മാറുന്ന നാഗമ്പടം നെഹ്രു സ്റ്റേഡിയം നവീകരിക്കാൻ 66 കോടി രൂപയുടെ പദ്ധതികളുമായി നഗരസഭ.
സ്റ്റേഡിയത്തോട് ചേർന്നുള്ള കടകളിൽ നിന്ന് ഒഴിയാൻ വ്യാപാരികൾക്ക് മുൻപേ നഗരസഭ നോട്ടീസ് നൽകിയിരുന്നു. എല്ലാ തവണയും നോട്ടീസ് നൽകുമെങ്കിലും ഇക്കുറി വാടക കരാർ പുതുക്കി നൽകാൻ അധികൃതർ തയ്യാറായില്ല. വർഷങ്ങളായി തകർന്നുകിടക്കുന്ന സ്റ്റേഡിയത്തിന്റെ ദുർഘടാവസ്ഥയും വികസന മുരടിപ്പും കണക്കിലെടുത്താണ് നഗരസഭയുടെ നേതൃത്വത്തിൽ 66 കോടി രൂപ ചെലവഴിച്ചുള്ള ബൃഹത്തായ നവീകരണ പദ്ധതി ഇപ്പോൾ പ്രഖ്യാപിച്ചത്.
സ്റ്റേഡിയം പൂർണമായും പൊളിച്ച് നീക്കി നല്ലൊരു ഫുട്ബോൾ ഗ്രൗണ്ടും സിന്തറ്റിക് ട്രാക്ക് അടക്കമുള്ള ആധുനിക നിലവാരത്തിലുള്ള പ്രൊപ്പോസലാണ് പുതിയ സ്റ്റേഡിയത്തിനായി തയ്യാറാക്കിയിരിക്കുന്നത്. ഗ്രൗണ്ട് രണ്ട് മീറ്ററോളം ഉയർത്തി, സൈഡ് വാൾ ഉയർത്തി, ഡ്രൈനേജ് സൗകര്യങ്ങളും ഉൾപ്പെടുത്തി ആധുനിക നിലവാരത്തോടെയാണ് പുതിയത് പണിയുക.
കിഫ്ബിയിൽപ്പെടുത്തി സ്റ്റേഡിയം പൂർത്തീകരിക്കുന്നതിനുള്ള ശ്രമമാണിപ്പോൾ നടക്കുന്നത്. ഇതോടെ വെള്ളക്കെട്ടില്ലാത്ത നിലവാരമുള്ള സ്റ്റേഡിയമായി മാറ്റാൻ സാധിക്കും. പവിലിയൻ അടക്കം പൊളിച്ചുമാറ്റി പുതിയത് പണിയും.
ഓരോ നിയോജക മണ്ഡലത്തിലും ഏതെങ്കിലും പ്രോജക്ട് എംഎൽഎമാർക്ക് ശുപാർശ ചെയ്യാൻ സാധിക്കും. ആ പ്രോജക്ടായി എംഎൽഎ കൂടിയായ സ്പീക്കർ ശുപാർശ ചെയ്തത് കോട്ടയം നെഹ്റു സ്റ്റേഡിയമാണ്. കിഫ്ബിയിൽ ഫണ്ടിന്റെ അംഗീകാരം കിട്ടിയിട്ട് വേണം നിലവിലുള്ളത് പൊളിക്കാൻ. എത്രയും പെട്ടെന്ന്‌ പണി പൂർത്തിയാക്കാൻ സാധിക്കുമെന്ന പ്രതീക്ഷയാണ് കോട്ടയം നഗരസഭാധ്യക്ഷൻ എംപി സന്തോഷ്‌കുമാർ പങ്കുവെയ്ക്കുന്നത്.
