കോഴിക്കോട് : ജിഎസ്‌ടി തട്ടിപ്പുമായി ബന്ധപ്പെട്ട് പിടികൂടിയ വാഹനങ്ങൾ തന്നെ കസ്റ്റഡിയിൽ നിന്ന് കടത്തിക്കൊണ്ടുപോകുന്ന സംഭവത്തിൽ അന്വേഷണം ശക്തമാക്കി ജിഎസ്‌ടി ഇന്റലിജൻസ്.
കേസിൽ മൂന്നാമത്തെ ലോറിയും പിടികൂടി. രാജസ്ഥാൻ രജിസ്ട്രേഷനുള്ള ലോറിയാണ് കർണാടകയിൽ നിന്ന് ജിഎസ്‌ടി ഇന്റലിജൻസ് സംഘം കണ്ടെത്തിയത്. കസ്റ്റഡിയിലെടുത്ത വാഹനം പിന്നീട് കോഴിക്കോട് എത്തിച്ചു.
കഴിഞ്ഞ മാസം 12നാണ് ഈ ലോറി ജിഎസ്‌ടി അധികൃതർ കസ്റ്റഡിയിലെടുത്തത്. എന്നാൽ സെപ്റ്റംബർ 28ന് വാഹനം ജിഎസ്‌ടി കസ്റ്റഡിയിൽ നിന്ന് കടത്തിക്കൊണ്ടുപോയെന്നാണ് വിവരം. തുടർന്ന് നടത്തിയ അന്വേഷണത്തിലാണ് കർണാടകയിൽ നിന്ന് ലോറി കണ്ടെത്തിയത്.
വാഹനം പിടികൂടിയ ശേഷം നടപടികൾ പൂർത്തിയാക്കി കോഴിക്കോട് എത്തിക്കുകയായിരുന്നു. കൊച്ചിയിൽ നിന്ന് സൂറത്തിലേക്ക് പെറ്റ് സ്ക്രാപ്പ് കൊണ്ടുപോകുന്നതിനിടെയാണ് ലോറി ജിഎസ്‌ടി അധികൃതരുടെ ശ്രദ്ധയിൽപ്പെട്ടത്. നികുതി വെട്ടിപ്പ് നടത്തുന്നതിനായി വ്യാജ ഇ-വേ രേഖകൾ തയ്യാറാക്കിയതായാണ് കണ്ടെത്തൽ. ചരക്കുനീക്കവുമായി ബന്ധപ്പെട്ട രേഖകളിൽ കൃത്രിമം കാണിച്ചാണ് നികുതി ബാധ്യത ഒഴിവാക്കാൻ ശ്രമിച്ചതെന്നാണ് വിവരം.
സമാന രീതിയിലുള്ള നികുതി തട്ടിപ്പ് ഈ വർഷം തന്നെ മൂന്നാം തവണയാണ് കണ്ടെത്തുന്നതെന്നും ജിഎസ്‌ടി ഇന്റലിജൻസ് വ്യക്തമാക്കുന്നു. കസ്റ്റഡിയിലെടുത്ത വാഹനങ്ങൾ പോലും പിന്നീട് കടത്തിക്കൊണ്ടുപോയ സാഹചര്യത്തിൽ സംഭവത്തിന് പിന്നിലുള്ള കൂടുതൽ വിവരങ്ങൾ കണ്ടെത്തുന്നതിനുള്ള പരിശോധനയും തുടരുകയാണ്.
വാഹനം കസ്റ്റഡിയിൽ നിന്ന് എങ്ങനെ പുറത്തേക്ക് കൊണ്ടുപോയി, ഇതിന് പിന്നിൽ മറ്റാരുടെയെങ്കിലും സഹായമുണ്ടായിരുന്നോ തുടങ്ങിയ കാര്യങ്ങളും അന്വേഷണത്തിന്റെ ഭാഗമായി പരിശോധിക്കുന്നുണ്ട്. മൂന്നാമത്തെ ലോറിയും കണ്ടെത്തിയതോടെ ജിഎസ്‌ടി തട്ടിപ്പിന്റെ വ്യാപ്തിയും വാഹനങ്ങൾ കടത്തിക്കൊണ്ടുപോയ രീതിയും സംബന്ധിച്ച് കൂടുതൽ വിവരങ്ങൾ പുറത്തുവരുമെന്ന പ്രതീക്ഷയിലാണ് അന്വേഷണ സംഘം.
