എറണാകുളം : വാഴച്ചാൽ ട്രൈബൽ ഹോസ്റ്റലിൽ നിന്ന് അഞ്ചു വിദ്യാർത്ഥികളെ കാണാതായത് മണിക്കൂറുകളോളം പ്രദേശത്ത് കടുത്ത ആശങ്ക പരത്തി. ചൊവ്വാഴ്ച വൈകിട്ട് അഞ്ചുമണിയോ ടെയാണ് ഹോസ്റ്റലിൽ നിന്ന് കുട്ടികൾ ചാടിപ്പോയത്. 7 വയസ്സുള്ള ഒരു കുട്ടിയും 8 വയസ്സുള്ള രണ്ടു പേരും 10, 12 വയസ്സുള്ള ഓരോ കുട്ടികളുമാണ് വനമേഖലയിലേക്ക് കടന്നത്.
കുട്ടികളെ കാണാതായ വിവരമറിഞ്ഞ ഉടൻ തന്നെ പോലീസും വനം വകുപ്പും ചേർന്ന് പ്രദേശത്ത് വ്യാപകമായ തിരച്ചിൽ ആരംഭിച്ചു. വന്യജീവി സാന്നിധ്യമുള്ള വനമേഖലയായതിനാൽ ഏറെ ആശങ്കയോടെയാണ് നാട്ടുകാരും ഉദ്യോഗസ്ഥരും തിരച്ചിലിനിറങ്ങിയത്. തുടർന്ന് മൂന്നര മണിക്കൂർ നീണ്ട തീവ്രമായ തിരച്ചിലിനൊടുവിൽ രാത്രി എട്ടരയോടെ വനത്തിനുള്ളിൽ നിന്ന് അഞ്ചു കുട്ടികളെയും സുരക്ഷിതമായി കണ്ടെത്തുകയായിരുന്നു.
കുട്ടികൾ കാടിനുള്ളിലേക്ക് പോകാനുണ്ടായ സാഹചര്യത്തെക്കുറിച്ചും ഹോസ്റ്റലിലെ സുരക്ഷാ വീഴ്ചകളെക്കുറിച്ചും ബന്ധപ്പെട്ട അധികൃതർ അന്വേഷണം ആരംഭിച്ചിട്ടുണ്ട്. കുട്ടികളുടെ ആരോഗ്യനില തൃപ്തികരമാണെന്ന് വനപാലകരും പോലീസും അറിയിച്ചു.
