തിരുവനന്തപുരം : കോൺഗ്രസിൽ മുഖ്യമന്ത്രിക്കസേരയ്ക്കായുള്ള പോര് കടുക്കുമ്പോൾ പുതിയ നീക്കവുമായി രമേശ് ചെന്നിത്തല. കേരളയാത്ര പോഡ്കാസ്റ്റുമായാണ് ചെന്നിത്തല രംഗത്തെത്തിയിരിക്കുന്നത്. പോഡ്കാസ്റ്റിനായി പുതിയ യൂട്യൂബ് ചാനൽ തുടങ്ങി.
രാഷ്ട്രീയ നേട്ടത്തിനുവേണ്ടിയല്ല, മറിച്ച് ഭാവി കേരളത്തെ കുറിച്ച് ചർച്ച ചെയ്യാനാണ് പോഡ്കാസ്റ്റെന്ന് ചെന്നിത്തല പറഞ്ഞു. നാല് പതിറ്റാണ്ടത്തെ തന്റെ പൊതുപ്രവർത്തനത്തിൽ നിന്ന് ഉരുത്തിരിഞ്ഞ കാഴ്ചപ്പാടുകളാണ് പോഡ്കാസ്റ്റിലെന്നും അദ്ദേഹം കൂട്ടിച്ചേർത്തു.
പ്രതിച്ഛായ കൂട്ടാൻ പുതിയ തന്ത്രങ്ങളാണ് നേതാക്കൾ പയറ്റുന്നത്. റീലുകൾക്ക് പുറമേ ഡോക്യുമെന്ററികളും പുസ്തകങ്ങളും പുറത്തിറക്കിയാണ് പലരുടേയും പ്രചാരണം. പുസ്തകം പുറത്തിറക്കിയാണ് എഐസിസി ജനറൽ സെക്രട്ടറി കെ സി വേണുഗോപാലിന്റെ പ്രചാരണം. നിയമസഭയിലെയും ലോക്സഭയിലെയും ശ്രദ്ധേയമായ പ്രസംഗങ്ങൾ കോർത്തിണക്കിയുള്ള പുസ്തകമാണ് കെ സി വേണുഗോപാൽ പുറത്തിറക്കുന്നത്. ‘നേരിനൊപ്പം പോരാട്ടങ്ങൾ നിലപാടുകൾ’ എന്നാണ് പുസ്തകത്തിന്റെ പേര്. വിവിധ കാലഘട്ടങ്ങളിൽ കെ സി വേണുഗോപാൽ ഉയർത്തിയ രാഷ്ട്രീയ നിലപാടുകളുടെയും പോരാട്ടങ്ങളുടെയും നേർക്കാഴ്ചയാണ് ഈ സമാഹാരം.
