തിരുവനന്തപുരം: രാഹുല് മാങ്കൂട്ടത്തില് എംഎല്എയ്ക്കെതിരെ കോണ്ഗ്രസ് ഹൈക്കമാന്ഡിന് പരാതി. യൂത്ത് കോണ്ഗ്രസ് സംസ്ഥാന ജനറല് സെക്രട്ടറി സജന ബി സാജന് ആണ് പരാതി നല്കിയത്. രാഹുലിനെതിരെയുള്ള ആരോപണങ്ങള് പാര്ട്ടി അന്വേഷിക്കണമെന്നാണ് പരാതിയില് ആവശ്യപ്പെടുന്നത്.
കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ, എഐസിസി ജനറല് സെക്രട്ടറി കെ സി വേണുഗോപാല്, ലോക്സഭ പ്രതിപക്ഷ നേതാവ് രാഹുല്ഗാന്ധി, പ്രിയങ്ക ഗാന്ധി എംപി എന്നിവര്ക്കാണ് പരാതി നല്കിയിട്ടുള്ളത്. രാഹുല് മാങ്കൂട്ടത്തിലിനെതിരെ യൂത്ത് കോണ്ഗ്രസില് പ്രതിഷേധം ശക്തമാകുന്നതിനിടെയാണ് സജന പരാതിയുമായി രംഗത്തെത്തിയത്.
അതേസമയം, രാഹുല് മാങ്കൂട്ടത്തില് തദ്ദേശ തെരഞ്ഞെടുപ്പ് പ്രചാരണത്തില് സജീവമാകുന്നതിനെച്ചൊല്ലി കോണ്ഗ്രസില് അഭിപ്രായ ഭിന്നത തുടരുകയാണ്. രാഹുലിനെ പിന്തുണച്ച് കെപിസിസി മുന് പ്രസിഡന്റ് കെ സുധാകരന് രംഗത്തു വന്നിരുന്നു. എന്നാല് കെ സുധാകരനെ തള്ളി കെ മുരളീധരനും രമേശ് ചെന്നിത്തലയും രംഗത്തെത്തി. രാഹുല് സസ്പെന്ഷനിലാണെന്നും, പാര്ട്ടി നേതാക്കള്ക്കൊപ്പം വേദി പങ്കിടാനാകില്ലെന്നുമാണ് മുരളീധരന് പറഞ്ഞത്.
