തിരുവനന്തപുരം : 18-ാം ലോക്സഭയിലെ പ്രോ ടേം സ്പീക്കര് നിയമനത്തില് കോണ്ഗ്രസ് എം.പി. കൊടിക്കുന്നില് സുരേഷിനെ തഴഞ്ഞതില് കേന്ദ്രസര്ക്കാരിനെതിരെ മുഖ്യമന്ത്രി പിണറായി വിജയൻ.
സഭയില് ഏറ്റവും കൂടുതല് കാലം അംഗമായിട്ടും മാവേലിക്കര എംപി കൊടിക്കുന്നില് സുരേഷിനെ തഴഞ്ഞത് എന്തിനാണെന്ന് കേന്ദ്ര സര്ക്കാര് വ്യക്തമാക്കേണ്ടതുണ്ട്. സംഘപരിവാര് പിന്തുടരുന്ന സവര്ണ്ണ രാഷ്ട്രീയമാണ് ഈ തീരുമാനത്തിനു പിന്നിലെന്ന് സംശയിക്കു ന്നവര്ക്ക് എന്താണ് ബിജെപിയുടെ മറുപടിയെന്നും പിണറായി ചോദിച്ചു.
പാര്ലമെന്ററി ജനാധിപത്യ മര്യാദകളെയും സഭയിലെ കീഴ്വഴക്കങ്ങളെയും അംഗീകരിക്കില്ല എന്ന ധാര്ഷ്ട്യമാണ് ബി.ജെ.പിക്ക്. ഇക്കഴിഞ്ഞ ലോകസഭയില് ഡെപ്യൂട്ടി സ്പീക്കര് പദവി അഞ്ചു വര്ഷവും ഒഴിച്ചിടുകയായിരുന്നു. പ്രതിപക്ഷകക്ഷിയില്പ്പെട്ട ആരെയും ആ സ്ഥാനത്ത് അംഗീകരിക്കാന് കഴിയില്ലെന്ന മനോഭാവമായിരുന്നു ഇതിന് പിന്നിൽ. ബി.ജെ.പി. നേതൃത്വത്തിന്റെ ഈ ധിക്കാരപരമായ സമീപനം ഇന്ത്യന് ജനാധിപത്യത്തോടുള്ള വെല്ലുവിളിയും അവഹേളനവുമായി മാത്രമേ കാണാന് കഴിയൂയെന്നും പിണറായി വ്യക്തമാക്കി.
