പാലാ: ഗവ.ജനറല്‍ ആശുപത്രിയില്‍ നടന്ന സങ്കീര്‍ണമായ ശസ്ത്രക്രിയയിലൂടെ 4.5 കിലോ തൂക്കം വരുന്ന ഗര്‍ഭപാത്രമുഴ വിജയകരമായി നീക്കം ചെയ്തു. മരങ്ങാട്ടുപിള്ളി സ്വദേശിനിയായ 40 വയസുകാരിക്കാണ് ശസ്ത്രക്രിയ നടത്തിയത്.
വയറുവേദനയെ തുടര്‍ന്നാണ് യുവതി ആശുപത്രിയില്‍ ചികിത്സ തേടി എത്തിയത്. പരിശോധനയില്‍ ഗര്‍ഭപാത്രത്തില്‍ വലിയൊരു മുഴയുണ്ടെന്ന് കണ്ടെത്തി. തുടര്‍ന്ന് യുവതിയുടെ ആരോഗ്യ നില വിലയിരുത്തിയാണ് ശസ്ത്രക്രിയ നടത്തിയത്.
ശസ്ത്രക്രിയയ്ക്കും പരിചരണത്തിനും ശേഷം രോഗി സുഖമായി വീട്ടിലേയ്ക്ക് മടങ്ങി. പാലാ ജനറല്‍ ആശുപത്രിയിലെ നിര്‍ണായകമായ ഒരു ചുവടുവയ്പ്പാണിത്. ആശുപത്രിയിലെ ശസ്ത്രക്രിയ വിഭാഗത്തില്‍ സജ്ജമാക്കിയ അത്യാധുനിക ഉപകരണങ്ങളുടെ സഹായത്തോടെയാണ് സങ്കീര്‍ണ ശസ്ത്രക്രിയകള്‍ നടത്തിയത്.
ആശുപത്രി സൂപ്രണ്ട് ഡോ. ടി.പി. അഭിലാഷിന്റെ ഏകോപനത്തില്‍ ഗൈനക്കോളജി വിഭാഗം ഡോ. ആശാറാണി, ഡോ.തോമസ് കുര്യാക്കോസ്, ഡോ.സന്ദീപ് എന്നിവരും അനസ്തേഷ്യാ വിഭാഗത്തിലെ ഡോ.രമ്യ, സ്റ്റാഫ് നഴ്‌സ് സീനയും അടങ്ങിയ സംഘമാണ് ശസ്ത്രക്രിയയ്ക്ക് നേതൃത്വം നല്കിയത്.
ശസ്ത്രക്രിയ നടത്തിയ മെഡിക്കല്‍ സംഘത്തെ മന്ത്രി വീണാ ജോര്‍ജ് അനുമോദിച്ചു.
